Valvira oahpista ja goziha dearvvašvuohtafuolahusa ámmátolbmuid ja doaibmaovttadagaid barggu sihke almmolaš ja priváhta dearvvašvuohtafuolahusas. Valvira bargun lea

  • doallat bajás Toimintaluvat (valvira) dearvvašvuohtafuolahusa ámmátolbmuin
  • gieđahallat guoddaleami dalle, go dikšunmeattáhus eahpiduvvo váikkuhan buohcci jápmimii dehe váttes lápmahuvvamii. Eará dáhpáhusas guoddalusa gieđahallá guovlohálddahusa virgedoaimmahat.
  • gozihit dikšundáhkádusa mearreáiggiid ollašuvvama.

Valvira mieđiha čuovvovaš lobiid

  • ámmátbarganvuoigatvuođaid dearvvašvuohtafuolahusa ámmátolbmuide
  • lobiid priváhta dearvvašvuohtafuolahusa bálvalusaid buvttadeapmái dalle, go doaibman lea máŋgga guovlohálddahusa virgedoaimmahaga guovllus. Eará dáhpáhusas lobi mieđiha guovlohálddahusa virgedoaimmahat.
  • gođuslobiid (olbmuid, eallagiid, gođđosiid ja seallaid dálkkasdieđalaš atnu)
  • Lobit áhpehisvuođa gaskkalduhttimii ja steriliseremii dihto dáhpáhusain.

Guovlohálddahusa virgedoaimmahagat oahpistit ja gozihit sihke almmolaš ja priváhta dearvvašvuohtafuolahusa bálvalanbuvttadeddjiid gielddain

Guovlohálddahusa virgedoaimmahat mieđiha lobi priváhta sosiála- ja dearvvašvuohtafuolahusa doibmii dalle, go doaibman lea dušše ovtta gieldda dehe ovtta guovlohálddahusa virgedoaimmahaga guovllus, gieđahallá guoddalusaid sihke njulgen- ja váidalanáššiid ja neavvu áššehasa, jos bálvalusain dehe daid šlájas leat áššehasa mielas duođalaš váillit.

Dearvvašvuohtafuolahusa bargoaddi galgá gozihit iežas doaimma

Dearvvašvuohtafuolahusa bargoaddiin lea vuosttaš ovddasvástádus gozihit iežas doaimma. Bargoaddi galgá gozihit ovdamearkka dihte bargiid, sajiid ja rusttegiid. Almmolaš dearvvašvuohtafuolahusa doaibmaovttadagas galgá leat plána šládjahálddašeamis ja buohccedorvvolašvuođas.

Almmolaš dearvvašvuohtafuolahusa doaimma goziha maid gielddaid ja gieldaovttastumiid dárkkistanlávdegottiid. Daid bargun lea árvvoštallat gieldda dehe gieldakonsearnna ekonomalaš ja doaibmaulbmiliid ollašuvvama. Dárkkistanlávdegoddi raportere fuomášumiinis gieldda dehe buohccedikšunbiirre gieldaovttastumi stivrii.

Priváhta dearvvašvuohtafuolahusa fitnodagas galgá leat lohpi iežas doibmii sihke iešgozihanplána

Priváhta dearvvašvuohtafuolahusa fitnodagas galgá leat lohpi iežas doibmii. Lobi mieđiha dat guovlohálddahusa virgedoaimmahat, man guovllus fitnodat doaibmá. Jos fitnodat doaibmá máŋgga guovlohálddahusa virgedoaimmahaga guovllus, lobi mieđiha Valvira.

Priváhta dearvvašvuohtafuolahusa bálvalanbuvttadeddjiin galgá dasa lassin leat iešgozihanplána. Plánas govviduvvojit earret eará fitnodaga doaibmajurdda sihke áššit, mat laktásit bargiid máhttui, sajiide ja buohccedorvvolašvuhtii. Bálvalanbuvttadeaddjis galgá leat lohpeeiseválddi dohkkehan hoavda, gean ovddasvástádussan leat dearvvašvuohtabálvalusat ja dat, ahte doaibma deavdá lága gáibádusaid.

Fimea bearráigeahččá dálkkassuorggi

Dálkkassuorggi dorvvolašvuohta- ja ovddidanguovddáš Fimea bearráigeahččá Suomas dálkasiid, varra- ja gođusbuktagiid sihke ovddida dálkkassuorggi. Virgedoaimmahaga bargguide gullet dálkkassuorggi lohpe- ja gozihanbarggut, dutkan- ja ovddidanbarggut sihke dálkkasdieđu buvttadeapmi ja gaskkusteapmi. Fimea earret eará mieđiha doaibmalobiid apteaikkaide ja čuovvu dálkasiid váddováikkuhusaid.