Váldonjuolggadusa mielde bálvalanválljašupmái gullet dálkkasdieđalaččat ja bátnedálkkasdieđalaččat ákkastallojuvvon

  • buozalmasaid ovddalgihtii eastadeapmi
  • dutkamat, mat dahkkojit buozalmasa gávnnaheami várás
  • dikšun
  • veajuiduhttin

Ulbmil lea, ahte suopmelaš dearvvašvuohtafuolahusas geavahuvvojit dušše váikkuheaddji, goluid dáfus dohkkehahtti ja dorvvolaš dutkan-, dikšun- ja veajuiduhttinvuogit. Dán dihte bálvalanválljašumi olggobeallái lea giddejuvvon doaibma, masa

  • gullá vuorddehahtti dearvvašvuođa ávkki dáfus govttohis stuora riska buohcci heggii dehe dearvvašvuhtii

dehe

  • man váikkuhusat lea unnit ja maid dagahan golut leat govttoheamit dan ektui mat leat vuorddehahtti dearvvašvuođa ávkkit ja mii lea dikšuma árvu.

Manin bálvalanválljašupmi lea mearriduvvon lágain?

Bálvalanválljašumi ásaheami duogážin lea EU:a buohccedirektiiva, man njuolggadusat bohte Suomas fápmui jagi 2014 álggu rájes. Direktiivva mielde nuppi riikii dikšumii ohcaleaddji olbmos lea vuoigatvuohta oažžut buhtadusa dušše dakkár dutkamis dehe dikšumis, mii gullá Suoma dearvvašvuohtafuolahusa bálvalanválljašupmái. Seamma bálvalanválljašupmi heivehuvvo sihke ruovttueatnamis ja rájiid rasttildeaddji diliin, go suopmelaš ohcala dikšumii nuppi EU-riikii dehe go nuppi EU-riikkas ohcaluvvo dikšumii Supmii.

Vaikko bálvalanválljašumi ásaheami duogábealde lea buohccedirektiiva, bálvalanválljašumi meroštallamiin váikkuhuvvo ruovttueatnama dearvvašvuohtabálvalusaide. Suomas eai leat ovdal gokčevaččat meroštallojuvvon almmolaččat ruhtaduvvon dearvvašvuohtafuolahusa bálvalusat.

Dearvvašvuohtafuolahusa bálvalanválljašumi ráđđi meroštallá bálvalanválljašumi

Dearvvašvuohtafuolahusa bálvalanválljašumi meroštallá sosiála- ja dearvvašvuohtaministeriija oktavuhtii vuođđuduvvon bálvalanválljašumi ráđđi. Dan bargun lea

  • addit ávžžuhusaid dearvvašvuođa ja buohccedikšuma dutkamiid, doaibmabijuid, sihke dikšun- ja veajuiduhttinvugiid gullamis bálvalanválljašupmái dehe ráddjemis eret bálvalanválljašumis
  • čuovvut ja árvvoštallat dearvvašvuohtafuolahusa bálvalanválljašumi
  • addit Áel:a ja eará eiseválddiid bivdaga mielde cealkámušaid bálvalanválljašumi heiveheamis ja dan meroštallamis adnon prinsihpain
  • oassálastit almmolaš ságastallamii ja ovttasbargui, mii gullá bálvalanválljašupmái
  • čuovvut riikkaidgaskasaš ovdáneami ja oassálastit riikkaidgaskasaš ovttasbargui
  • gieđahallat eará sosiála- ja dearvvašvuohtaministeriija dasa čujuhan áššiid.