MUITALUS: Loga mot dikšunvuoigatvuođat ollašuvvet geavadis

Stuđeantan EU-/Eeg-riikkas dehe Šveiccas

Milla sihkkelbárti Duiskkas

Milla vuolgá čakčii stuđeantalonohallamii Duiskii. Son gahččá sihkkeliiguin ja nordada bániidis. Heahti ii goit leat, daningo Milla beassá divššuhit mollanan báni bátnedoaktárii go čájáha eurohpalaš buohccedikšungoartta. Bátnedikšun máksá Millai liikká olu go dat máksá duiskalažžii, dehege báikkálaš áššehasmávssu veardde. Millas lea maid mátkedáhkádus, mas son ohcá buhtadusaid iežas máksin áššehasmávssus.

Bátnedoaktáris Milla fuobmá, ahte son hálidivččii seammas gaikkuhit iežas viissivuohtabáni. Bátnedoavttir goitge árvvoštallá, ahte dát ii leat dálkkasdieđalaččat vealtameahttun dikšun, nu ahte Milla ii oaččo bátnegaikuma eurohpalaš buohccedikšungoarttain. Milla sáhttá goitge gáikkuhit viissisvuohtabáni iežas goasttadusain ja ohcat dasa maŋálgihtii Áel-buhtadusaid.


Milla dikšunvuoigatvuođaid ákkat

Olgoriikkain orrun stuđereami dihte gehččojuvvo dábálaččat gaskaboddasaš orodeapmin, ná maid Milla dáhpáhusas. Milla seailu oadjuduvvon buohcama várás Suomas ja Suopma mieđiha sutnje eurohpalaš buohccedikšungoartta. Goarta heive EU- ja Eeg-riikkain sihke Šveiccas, ja dan čájehemiin Milla oažžu dálkkasdieđalaččat vealtameahttun dikšuma dehege mollanan báni divvuma báikkálaš áššehasmávssuin. Dálkkasdieđalaččat vealtameahttun dikšun dárkkuha dakkár dikšuma, mii ii sáhte vuordit olbmo ruoktot máhccama olgoriikkain. Doavttir árvvoštallá dikšundárbbu orodeami bistima ektui.

Milla sáhttá ohcat buhtadusaid maid iežas viissisvuohtabáni gaikumii, daningo EU-riikkavuložiin lea vuoigatvuohta ohcalit dikšuma várás nuppi EU-/Eeg-riikkaide ja Šveicii ja oažžut dikšumis buhtadusaid. Áel mieđiha buhtadusaid seamma ákkaiguin ja daid supmit leat seammat go priváhta dearvvašvuohtafuolahusa Áel-buhtadusat Suomas. Milla sáhttá nappo oažžut viissisvuohta báni gaikumis buhtadusaid seamma ládje go jos son livččii gaikkuhan báni priváhta bátnedoaktáris Suomas. Buhtadusat nuppi riikkas dahkkon dikšumis eai mieđihuvvo automáhtalaččat, muhto Milla ferte ohcat daid Áel:s.

Loga lasi