Áel buhtte dikšuma mátkegoluid, jos orut Suomas. Dasa lassin Áel buhtte mátkegoluid áššehassii, gii orru olgoriikkain, jos son oadjuduvvon buohcama várás Suomas dehe gean buohccedikšungoluid ovddasvástádus lea Suomas. Mátkebuhtadusat máksojuvvojit maid áššehassii, geas lea EU-láhkaásaheami dehe riikkaidgaskasaš soahpamuša vuođul vuoigatvuohta dikšumii Suomas. Jos ovdamearkka dihte leat ožžon eurohpalaš buohccedikšungoarttain dikšuma Suoma almmolaš dearvvašvuohtafuolahusas, oaččut Áel:s buhtadusa dikšumasat mátkegoluin, mat leat ollašuvvan Suomas.

Mátkegolut buhttejuvvojit lagamus buohccevissui dehe dearvvašvuohtaguovddážii

Áel buhtte mátkki lagamus almmolaš dehe priváhta dearvvašvuohtafuolahusa dikšunbáikái.

Jos don leat ieš válljen dikšunbáikki válljenfriddjavuođa vuođul dehe jos almmolaš dearvvašvuohtafuolahus ordnet du dikšuma bálvalanseđeliin, Áel buhtte mátkki

  • vuođđodearvvašvuohtafuolahussii eanemusat daid goluid mielde, mat livčče šaddan mátkkis ruovttugielddat váldodearvvašvuohtaguovddážii
  • spesiáladearvvašvuohtadikšumii eanemusat daid goluid mielde, mat livčče šaddan mátkkis lagamus universiteahttabuohccevissui.

Mátki priváhta dearvvašvuohtafuolahusa dikšunbáikái buhttejuvvo seamma ládje go almmolaš dearvvašvuohtafuolahussii dahkkon mátki dalle, go addojuvvon dikšun dehe dutkan buhttejuvvo buohcanoajus.

  • Áel buhtte maid veajuiduhttimii dahkkon mátkkiid, go veajuiduhttin vuođđuduvvá Áel:a dehe almmolaš dearvvašvuohtafuolahusa veajuiduhttinmearrádussii.
  • Áel ii buhtte sierra dahkkon dálkasiid viežžanmátkki apteikii.
  • Mátkegoluid buhtadusa sáhttá ohcat Áel:s guđa mánu siste goluid ollašuvvamis. Oza buhtadusa Áel:a áššiid fierbmedikšunbálvalusas dehe skoviin SV 4.

Mátkegolut buhttejuvvojit hálbbimus mátkkoštanvuogi mielde

Sáhtát oažžut buhtadusa almmolaš dehe priváhta dearvvašvuohtafuolahusas addojuvvon buohccedikšumii sihke mátkkiide áhpehisvuođa ja riegádahttima geažil, go gollu ovtta guvlui manná badjel 25 euro iežasovddasvástádusa.

Áel buhtte mátkegoluin eanas hálbbimus mátkkoštanvuogi mielde. Dábálaččat dat lea almmolaš fievru, ovdamearkka dihte toga dehe linnjabiila.

  • Jos geavahat eará go hálbbimus mátkkoštanvuogi, ovdamearkka dihte dákse, dus galgá leat dearvvašvuohtafuolahusa addin duođaštus dan dárbbašlašvuođas. Jos dákse geavaheapmi dahkko johtalusdiliid geažil, don galggat ákkastallat dákse geavahusa buhttenohcamušastat.
  • Jos dagat mátkki dearvvašvuohtafuolahusa ovttadahkii dehe veajuiduhttimii ja dus lea buozalmasat geažil vuoigatvuohta Áel:a buhtadussii dáksemátkkis, diŋgo mátkki iežat buohccedikšunbiirre guvllolaš diŋgonnummáris. Dalle mávssát mátkkis dušše iežasovddasvástádusossodaga 25 euro. Jos diŋgot dáksemátkki eará báikkis, mávssát ieš oba dáksemátkki hatti ja sáhtát ohcat Áel:s buhtadusa maŋálgihtii. Dalle mátkki iežasovddasvástádus lea 50 euro.