Buhtadusa oažžun gáibida dábálaččat, ahte danveardásaš dikšun livččii Suomas addojuvvon almmolaš dearvvašvuohtafuolahusas ja ahte das livččii ožžon Áel-buhtadusa. Buhtadusavuloš dikšun galgá gullat Suoma dearvvašvuohtafuolahusa bálvalanválljašupmái. Bálvalanválljašumi meroštallá dearvvašvuohtafuolahusa bálvalanválljašupmeráđđi, mii doaibmá sosiála- ja dearvvašvuohtaministeriija oktavuođas.

Áel buhtte maid gáiddosbálvalussan addojuvvon dikšuma. Gáiddosbálvalusain dárkkuhuvvojit buohccedikšuma bálvalusat, mat addojuvvojit olgoriikkain videooktavuođa bakte.

EU- dehe Eeg-riikkas dehe Šveiccas šaddan gollu

Jos mátkkoštat nuppi EU- dehe Eeg-riikii dehe Šveicii dearvvašvuohtabálvalusaid geavaheami várás, gažaldat lea dikšumii ohcaleamis olgoriikkaide. Áel buhtte dalle goluid buohccedikšunbuhtadussan seamma ládje go jos livččet geavahan Suomas priváhta dearvvašvuohtafuolahusa bálvalusaid. Sáhtát nappo oažžut dikšumis buohccedikšunbuhtadusa Áel:a buhtadusmáksomeriid mielde.

Jos don leat ožžon olgoriikkain addojuvvon dikšuma várás Áel:s ovdalobi, nu mávssát dikšumis dušše dikšunaddi riikka áššehasmávssu. Áel bearrá rehkegiin dikšuma eará goluid buohccedikšunbiirrestat. Jos šaddat máksit buot goluid ieš, de sáhtát ohcat buhtadusa Áel:s.

Jos orodat nuppi EU- dehe Eeg-riikkas dehe Šveiccas gaskaboddasaččat ja dárbbašat dálkkasdieđalaččat vealtameahttun dikšuma, nu oaččut dikšuma eurohpalaš buohccedikšungoarttain. Mávssát dikšumis seamma áššehasmávssu go báikkálaš orrut danveardásaš dikšuma dilis. Áššehasmáksu ii buhttejuvvo. Jos mávssát buot dikšungoluid ieš, nu sáhtát ohcat buhtadusa dikšuma addán riikka buohcanoadjolágádusas dehe Áel:s.

  • Jos ozat buhtadusaid dikšuma addán riikka buohcanoadjolágádusas, oaččut buhtadusaid čuozáhatriikka láhkaásaheami mielde.
  • Jos ožžot dikšuma nuppi Davviriikkas, Áel máksá buhtadusaid maŋálgihtii álohii dikšuma addán riikka láhkaásaheami mielde.
  • Jos ozat Áel:s buhtadusaid eará EU-riikkas dehe Eeg-riikkas dehe Šveiccas šaddan goluin, sáhtát válljet buhtadusa juogo dikšuma addán riikka dehe Suoma láhkaásaheami mielde.

Jos orut nuppi EU- dehe Eeg-riikkas dehe Šveiccas ja Suomas lea ovddasvástádus du dikšungoluin, mávssát dikšumis ieš seamma áššehasmávssu go báikkálaš orrut. Dikšuma oažžun seamma áššehasmávssuin báikkálaš olbmuiguin gáibida, ahte registreret iežat orrunriikkat buohcanoadjolágádusas.

  • Jos mávssát dikšungoluid orrunriikkastat, oza buhtadusaid báikkálaš buohcanoadjolágádusas.
  • Jos mávssát dikšungoluid eará báikkis go orrunriikkastat, oza buhtadusaid Áel:s.

Eará báikkis go EU- dehe Eeg-riikkas dehe Šveiccas šaddan gollu

Jos don leat dárbbašan dikšuma fáhkkestaga buohccáma, guhkesáigge buozalmasa, áhpehisvuođa dehe riegádahttima dihte eará báikkis go EU- dehe Eeg-riikkas dehe Šveiccas ja don leat máksán dikšuma goasttádusaid ieš, de oaččut goasttádusaide buohccedikšunbuhtadusaid maŋálgihtii Áel:s. Buhtadus lea seamma go jos livččet geavahan priváhta dearvvašvuohtafuolahusa bálvalusaid Suomas dehe oastán dálkasiid apteaikkas.

Jos don leat mátkkoštan eará báikái go EU- dehe Eeg-riikii dehe Šveicii dearvvašvuohtabálvalusaid geavaheami várás, goasttádusat eai buhttejuvvo.

Maiddái eará báikkis go EU- dehe Eeg-riikkas dehe Šveiccas šaddan mátkegolut eai buhttejuvvo.