Jos don leat Suomas buohcceviessodikšumis almmolaš dearvvašvuohtafuolahusas ja don sirdojuvvot dikšunaddi mearramiin joatkkadikšumii nuppi riikii, sirdinfievrrideami goluid ovddasvástádus lea dábálaččat dikšunaddis Suomas. Jos sirdinfievrrideapmi dáhpáhuvvá vuosttaš sajis iežat dáhtu mielde, dus lea dábálaččat alddát ovddasvástádus fievrridangoluin. Jos áššis lea sohppon ovddalgihtii, sirdinfievrrideami goluid ovddasvástádus sáhttá leat maid eará bealis dehe daidda sáhttá oassálastit maid eará bealli, dego vuostáváldi buohcceviessu dehe dáhkádusfitnodat.

Jos oaččut Suomas dikšuma priváhta dearvvašvuohtafuolahusas, čielggat sirdinfievrrideami goluid máksi ovdal mátkki ollašuvvama. Vuolggasadjin lea, ahte dus alddát lea ovddasvástádus goluin.

Dikšun galgá addojuvvot dađi lági mielde, ahte basttát ieš mátkkoštit ruoktot

Don oaččut dikšuma almmolaš dearvvašvuohtafuolahusas dađi lági mielde, ahte basttát dorvvolaččat mátkkoštit ruovttoluotta iežat orrunriikii. Jos almmolaš dearvvašvuohtafuolahus mearrida ordnet buohccái sirdinfievrrideami ruovttueatnamii, dat galgá sohppojuvvot ovttas vuostáváldi buohcceviesuin dehe lágádusain geavada ortnegiin. Buohcceviessosirdima goluid ovddasvástádus lea dikšunaddis dehe buohccis alddis, jos son sirdojuvvo eará báikái go nuppi Davviriikii.

Buohcceviessosirdin nuppi Davviriikii

Jos orut nuppi Davviriikkas ja leat čálihuvvon sisa buohccin Suoma almmolaš dearvvašvuohtafuolahusa dikšumii, sáhttá buohcceviessosirdin ordnejuvvot Davviriikkalaš sosiáladorvosoahpamuša vuođul almmá dan haga, ahte mávssát ieš fievrridangoluid. Dikšunaddát čilge dalle sirdinfievrrideami ollašuvvama áššiid Áel:a riikkaidgaskasaš áššiid guovddážiin ja fuolaha fievrridanordnedemiin.

Olbmo, gii lea guhkesáiggedikšumis, sirdin nuppi Davviriikii

Jos don leat guhkesáigge lágádusdikšumis Suomas dehe oaččut eará guhkesáigge sosiálabálvalusa áittardeami ja hálidat muotkut orrut nuppi Davviriikii, Davviriikkalaš sosiálabálvalussoahpamuš sáhttá geatnegahttit du orrungieldda fárremat ordnedemiin.

Gielda soahpá du muotkuma soahpamušas vuostáváldi sosiálabálvalusas ovddasvástideaddji eiseválddiin, goas ovddasvástádus dikšumat ordnemis ja dan goluin sirdása sáddejeaddji bealis vuostáváldái. Golloovddasvástádus sáhttá sirdásit muotkunbeaivve dehe dasa sáhttá sohppojuvvot ovdamearkka dihte guđa mánu sirddaáigi. Soahpamušas gielda soahpá dábálaččat maid, mii beliid máksá du mátkki ja mot du veahkeheamis adnojuvvo ávvir mátkki áigge.

Davviriikkalaš sosiálabálvalussoahpamuša ollašuhttima ovddasvástádus Suomas lea gielddain. Soahpamuša ulbmilin lea dahkat vejolažžan bistevaš dikšuma ja áittardeami dárbbašeaddji áššehasa muotkuma dakkár riikii, masa sus leat earenoamáš čatnasat.

Soahpamuš guoská sosiálafuolahusa guhkesáiggedikšuma dehe áittardeami dárbbašeaddji áššehasa muotkuma nuppi Davviriikii. Soahpamušas lea mearkkašupmi lagamusat áššehassii, gii lea guhkesáigge dikšumis, ja gii hálida muotkut orrut nuppi Davviriikii.