Dikšunriekteduođaštusat leat sierralágánat ja daid geavahanulbmil molsašuddá. Čájet dikšunriekteduođaštusa dikšunaddái, go boađát dikšumii. Duođaštus galgá leat fámus dikšuma addinmuttus.

Fáhkkestaga buohccán

Jos buohccát fáhkkestaga gaskaboddasaš orodeamát áigge (ovdamearkka dihte luopmomátkkis) dehe dárbbašat dikšuma guhkesáigge buozalmasa dehe áhpehisvuođa dehe riegádahttima dihte, sáhtát čujuhit iežat vuoigatvuođa dikšumii

  • eurohpalaš buohccedikšungoarttain (EHIC)
  • duođaštusain mii buhtte gaskaboddasaččat eurohpalaš buohccedikšungoartta
  • pássain dehe identitehtaduođaštusain, jos orut nuppi Davviriikkas
  • pássain, man lea mieđihan Ovttastuvvan gonagasriika dehe Austrália. Austrálias boahtti olbmo pássas galgá leat merken ráddjekeahtes orrunvuoigatvuođas Austrálias.
  • duođaštusain vuoigatvuođas dikšunovdamuniide Suomas, man lea mieđihan Áel.

Jos orut nuppi Davviriikkas, Ovttastuvvan gonagasriikkas dehe Austrálias, maiddái fásta orrunčujuhus galgá leat namuhuvvon riikkas, vai sáhttá oažžut dikšuma seamma áššehasmávssuin go dat, gii orru Suomas. Muital iežat čujuhusa dikšunaddái.

Dikšumii ohcaleapmi

Sáhtát ohcalit dikšumii Suoma almmolaš dearvvašvuohtafuolahussii, jos orut nuppi EU-riikkas. Gáibádussan lea, ahte muhtin EU-riikkas lea ovddasvástádus buohccedikšuma goluin. Suoma priváhta dearvvašvuohtafuolahussii sáhtát ohcalit das fuolakeahttá, gos orut dehe gos leat oadjuduvvon buohcama várás.

Jos ohcalat dikšumii Supmii, dus lea dábálaččat alddát ovddasvástádus dikšuma goluin. It šatta máksit ieš dikšungoluid, jos leat ožžon dikšuma várás iežat orrunriikka mieđihan ovdalobi (skovvi E 112 dehe S2). Ovdalobis lea dábálaččat meroštallojuvvon dikšunaddi lassin lobi vuoimmisorrunáigi ja dikšun, man goluid lohpi gokčá.

Duođaštus vuoigatvuođas dikšunovdamuniide Suomas

Sáhtát oažžut dikšuma almmolaš dearvvašvuohtafuolahusas maiddái Áel:a mieđihan Duođaštusain vuoigatvuođas dikšunovdamuniide Suomas.

Duođaštusas vuoigatvuođas dikšunovdamuniide Suomas lea meroštallojuvvon, man viidosaš dikšumii dus lea vuoigatvuohta Suoma almmolaš dearvvašvuohtafuolahusas ja leago dus vuoigatvuohta Áel:a buohccedikšuma buhtadusaide. Duođaštusain maid nannejuvvo dus berrojuvvon áššehasmávssu mearri ja sáhtátgo don ohcat almmolaš dearvvašvuohtafuolahusa dikšungoluide buhtadusaid stáhtas.

Sáhtát oažžut duođaštusa ovdamearkka dihte dalle, jos barggat, muhto it oro Suomas. Duođaštus lea nuvttá.

Jos ii leat dikšunriekteduođaštus

Jos dus ii leat dikšunriekteduođaštus, geahččal vuosttaš sajis ieš háhkat dárbbašlaš dikšunriekteduođaštusa dehe duođaštusa, mii buhtte dan, iežat buohcanoadjolágádusas dehe dan eiseválddis, mas lea ovddasvástádus du buohccedikšuma goluin.

Jos dus ii leat eurohpalaš buohccedikšungoarta dehe jos du goarta lea láhppon, oaččut duođaštusa, mii buhtte goartta, iežat buohcanoadjolágádusas.

Dárbbu mielde sáhtát bivdit Áel:a čilget dikšunriekteduođaštusat oažžuma olgoriikkain. Maiddái du dikšunaddi sáhttá dahkat bivdaga du ovddas.

  • Váldde oktavuođa Áel:a riikkaidgaskasaš áššiid guovddážii, +358 20 634 0200 (bálvalus árggaid d. 8 – 18 suoma- ja eŋgelasgillii) ja +358 20 634 0300 (bálvalus árggaid d. 8 – 18 ruoŧagillii)
  • Du dikšunaddi sáhttá váldit oktavuođa Áel:a riikkaidgaskasaš áššiid guovddáža nummárii +358 20 635 1808 (árggaid d. 9–16).

Jos dus ii leat dikšunriekteduođaštus dehe dat ii oažžašuva háhkkojuvvot, dikšunaddi bearrá dábálaččat rehkegiin dus dikšumisttát ollašuvvan duođalaš goluid.