Fárren Supmii bargin dehe fitnodatolmmožin

Jos boađát bargat Supmii nuppi EU- dehe Eeg-riikkas, Šveiccas dehe Kanada Quebecas, sáhtát dábálaččat geavahit almmolaš dearvvašvuohtafuolahusa bálvalusaid ja oažžut buohccedikšunbuhtadusaid, vaikko dus ii livčče ruovttugielda Suomas. Áel nanne du vuoigatvuođa dikšumii Suomas. Jos boađát bargat Supmii eará báikkis go EU- dehe Eeg-riikkas dehe Šveiccas dehe Kanada Quebecas, du vuoigatvuohta dikšumii vuođđuduvvá ruovttugildii ja oadjudeapmái buohcama várás Suomas dehe riikiifárrendirektiivii.


Go boađát Supmii bargat, du vuoigatvuhtii geavahit Suoma almmolaš dearvvašvuohtafuolahusa bálvalusaid ja oažžut buohccedikšuma buhtadusaid váikkuha

  • riika, gos boađát Supmii
  • du bargogaskavuođa bálká
  • barggatgo suopmelaš vai olgoriikkalaš bargoaddi bálvalusas.

Dus sáhttá leat vuoigatvuohta geavahit Suomas almmolaš dearvvašvuohtafuolahusa bálvalusaid ja oažžut Áel:s buohccedikšunbálvalusaid, vaikko it oroše Suomas bissovaččat dehe livčče oadjuduvvon buohcama várás Suomas. Dalle du bargamii dábálaččat guoskaduvvo EU-láhkaásaheapmi dehe riikkaidgaskasaš sosiáladorvosoahpamuš, man vuođul oažžut vuoigatvuođa dikšumii Suomas. Čielggat Áel:s oadjudeami buohcama várás ja dikšunvuoigatvuođaid Suomas, go boađát Supmii bargat.

Jos du ulbmilin lea fárret Supmii bissovaččat, daga fárrenilmmuhusa magistráhtii. Jos magistráhta registrere dutnje ruovttugieldda, sáhtát geavahit buot almmolaš dearvvašvuohtafuolahusa bálvalusaid seamma ládje go báikkálaš olbmot.

Bargan suopmelaš bargoaddi bálvalusas

Jos boađát bargat Supmii nuppi EU- dehe Eeg-riikkas dehe Šveiccas, de dus lea riekti almmolaš dearvvašvuohtafuolahusa bálvalusaide dan áiggi, go don leat bargoealáhat-, bárte- dehe barggohisvuohtaoadjuduvvon Suomas.  Jos boađát eará riikkain, dárbbašat dasa lassin Riikiifárrenvirgelágádusa dehe Suoma ambassáda mieđihan bargamii vuoigadahtti orodanlobi dehe duođaštusa.. Jos don gulat Suoma buohcanodjui, oaččut Áel:s buhtadusa priváhta dearvvašvuohtafuolahusas, dálkasiin ja buozalmasa dikšuma dihte dahkkon mátkegoluin.

Jos du ulbmilin lea fárret Supmii bissovaččat, daga fárrenilmmuhusa magistráhtii. Muitte ilmmuhit fárremisttát maid iežat ovddit orrunriikii. Jos magistráhta registrere dutne ruovttugieldda, sáhtát geavahit buot almmolaš dearvvašvuohtafuolahusa bálvalusaid seamma ládje go báikkálaš olbmot. Jos dus ii leat Suomas ruovttugielda, siđa Áel:s dikšunriekteduođaštusa.

Jos don it leat ovdal ohcan ovdamuniid dehe Áel-goartta, ja don leat fárren Supmii, daga ovdamunne- dehe Áel-goartaohcamuša lassin ilmmuhusa Supmii fárremis. Jos gulat Suoma buohcanodjui, oaččut Áel:s buhtadusa priváhta dearvvašvuohtafuolahusas, dálkasiin ja buozalmasa dikšuma dihte dahkkon mátkegoluin.

Jos barggat Suomas, muhto orut nuppi EU- dehe Eeg-riikkas dehe Šveiccas, dus leat seammalágán vuoigatvuođat dikšumii sihke barganriikkastat Suomas go maid orrunriikkastat. Registrere Áel:a mieđihan dikšunriekteduođaštusa orrunriikkastat.

Dasa lassin, jos don leat álggahan buozalmasa dikšuma Suomas ovdal go bázát ealáhahkii rádjebarggus, de dus lea riekti joatkit namuhuvvon buozalmasa dikšuma Suomas ealáhahkii báhcima maŋŋel. Siđa dalle dikšuma várás sierra dikšunriekteduođaštusa dan riikka buohcanoadjolágádusas, mas lea ovddasvástádus buohccedikšumat goluin go leat ealáhagas. Dikšunriekteduođaštusain oaččut joatkit dikšuma Suomas.

EU- dehe Eeg-riikkas dehe Šveiccas Supmii sáddejuvvon bargi dehe diplomáhta

Jos bargoaddát sádde du Supmii bargui nuppi EU- dehe Eeg-riikkas dehe Šveiccas, du bargoaddiriikkas lea ovddasvástádus du buohccedikšuma goluin. Gulat dábálaččat maiddái iežat bargoaddiriikka buohcanodjui.

Jos du bargan Suomas bistá vuollái ovtta jagi, čujut iežat vuoigatvuođa dikšumii Suomas du bargoaddiriikka mieđihan eurohpalaš buohccedikšungoarttain, mainna oaččut

  • dálkkasdieđalaččat vealtameahttun dikšuma almmolaš dearvvašvuohtafuolahusas gieldalačča áššehasmávssuin.
  • buohccedikšuma buhtadusaid priváhta dearvvašvuohtafuolahusa, dálkasiid ja mátkkiid goluin Áel:s. Oza buhtadusaid Áel:s maŋálgihtii.

Jos barggat Suomas badjel jagi, doaimmat Áel:ii iežat bargoaddiriikka mieđihan skovi registrerema várás. Áel mieđiha dán vuođul duođaštusa, mainna čujuhat iežat vuoigatvuođa dikšumii almmolaš dearvvašvuohtafuolahusas ja buohccedikšuma buhtadusaide.

Eará go EU- dehe Eeg-riikkain dehe Šveiccas boahtán olgoriikkalaš ovddastagas bargi diplomáhtain dehe eará olgoriikkalaš bargiin lea vuoigatvuohta oažžut almmolaš dearvvašvuohtafuolahusas dušše hohpolaš dikšuma. Olmmoš gokčá ieš dikšumis šaddan goluid. Maiddái dáhkádusfitnodat dehe eará bealli, ovdamearkka dihte olgoriikka ovddastat, sáhttá buhttet goluid.

Bargan riikkaidgaskasaš organisašuvnnas, mii lea Suomas

Riikkaidgaskasaš organisašuvnnaid bargiid vuoigatvuohta almmolaš dearvvašvuohtafuolahusa bálvalusaid geavaheapmái lea dan duohken makkár lea Suoma ja organisašuvnnaid gaskavuođa soahpamuš. Váldonjuolggadusa mielde riikkaidgaskasaš organisašuvnnat ordnejit ieža olgoriikkalaš bargiideaset dearvvašvuohtafuolahusa ja buohcanoaju. Jos dus lea ruovttugielda Suomas, sáhtát geavahit buot almmolaš dearvvašvuohtafuolahusa bálvalusaid.

Earret eará dáin beliin leat iežaset sosiáladorvoortnegat bargiidasaset. Jeara lassidieđuid gažaldatvuloš beliin dehe Áel:s.

Kanada Quebecis boahtán bargi

Kanada Quebecis gaskaboddasaččat Supmii bargui boahtán bargi ja sáddejuvvon bargi gullaba Quebeca buohcanodjui, man ovddasvástideaddji buohcanoadjolágádus mieđiha bargái skoviid, mat galget registrerejuvvot Ealáhatdorvoguovddážii ja Áel:ii.

Registrerema maŋŋel

  • sáhtát geavahit almmolaš dearvvašvuohtafuolahusa bálvalusaid seamma ládje go Suomas orru ja oaččut buohccedikšunbuhtadusaid Áel:s
  • oaččut Áel:s dikšunriekteduođaštusa, mainna sáhtát čájehit iežat vuoigatvuođa almmolaš dearvvašvuohtafuolahusa bálvalusaid geavaheapmái ja buohccedikšunbuhtadusaide.