Báhtareddjiid ja dorvobáikeohcciid buohccedikšun Suomas

Dorvobáikeohcciid dearvvašvuohtabálvalusaid ordnema ovddasvástádus lea vuostáváldinguovddážiin. Báhtareaddjit ožžot dikšuma Suoma almmolaš dearvvašvuohtafuolahusas dasto, go Digi- ja álbmotdiehtovirgelágádus (ovddeš magistráhta) lea registreren sidjiide ruovttugieldda. Orodanlobi ožžon báhtareaddjit oadjuduvvojit buohcama várás Suomas, goas sii leat vuoigadahttton maid priváhta dearvvašvuohtafuolahusa, dálkasiid ja mátkkiid Kela-buhtadusaide.


Dorvobáikeohcciid dearvvašvuohtabálvalusat

Dorvobáikeohcciide dearvvašvuohtabálvalusaid ordnejit vuostáváldinguovddážat, maid dollet bajás stáhta, gielddat ja Suoma Rukses Ruossa (SRR). Bálvalusaid ordnema ovddasvástádus lea dan vuostáváldinguovddážis, man áššehasregisttarii olmmoš lea registrerejuvvon. Vuostáváldinguovddážiin bargá dábálaččat dearvvašvuohtadikšu ja dasa lassin vuostáváldinguovddáš oastá dearvvašvuohtafuolahusa bálvalusaid priváhtasektoris dehe gielddas dehe gieldaovttastumis. Kela ii leat ovddasvástádus dorvobáikeohcciid buohccedikšuma goluin.

Jos vuostáváldinbálvalusaid oažžun olgoriikka olbmui ii mieđihuvvo orodanlohpi dehe su gaskaboddasaš suodjaleapmi nohká, de vuoigatvuohta vuostáváldinbálvalusaide nohká dihto áiggi geahčen.

Báhtareaddji vuoigatvuohta dearvvašvuohtabálvalusaide

Eiseválddit čujuhit báhtareddjiide ruovttugieldda Suomas. Go ruovttugielda lea mieđihuvvon, de báhtareaddjis lea vuoigatvuohta geavahit buresbirgenguovllu áššehasmávssuin buot almmolaš dearvvašvuohtafuolahusa bálvalusaid seamma ládje go eará olbmuin, geat orrot Suomas. Báhtareaddji sáhttá fárret njuolga hálus miel gildii go lea ožžon jotkkolaš orodanlobi.

Orodanlobi ožžon báhtareaddji oadjuduvvo buohcama várás Suomas, ja son oažžu iežas geavahussii Kela-goartta. Dalle sus lea riekti oažžut buohccedikšunbuhtadusaid Kelas.

Biinniduvvon báhtareddjiin ja dorvobáikeohcciin lea vejolašvuohta oažžut dikšuma Helssegis psykotraumalogiija guovddážis (suomagillii) ja Oulus biinniduvvon olbmuid veajuiduhttinbálvalusaid olis (suomagillii).