Báberkeahtes olbmuid buohccedikšun Suomas

Suomas orodit lágalaččat ja lágalaš orodanrievtti haga olbmot, geat gohčoduvvojit oppalašnamain báberkeahtes dehe báberkeahtes olbmuid lágáš olbmot. Báberkeahtes olbmuiguin lea hohpolaš dikšuma lassin riekti oažžut dihto vealtameahttun bálvalusaid almmolaš dearvvašvuohtafuolahusas. Báberkeahtes mánáin rievttit leat rávesolbmuid viidáseappot.


Báberkeahtes olbmuid dikšun ii leat mange dilis lágaheapme. Dearvvašvuohtafuolahusa ámmátolbmo geatnegasvuohtan ja riektin lea fállat dearvvašvuohtafuolahusa bálvalusaid daidda, geat daid dárbbahit. Dearvvašvuohtafuolahusa ámmátolbmuin ii leat riekti ilmmuhit eiseválddiide lágaheamit riikkas orodeaddji olbmos, ja sin čatná maid viiddes suollemassandoallan- ja veahkehangeatnegasvuohta.

Dearvvašvuohtafuolahusa ámmátolmmoš árvvoštallá álohii bálvalusaid vealtameahttunvuođa ja dárbbu. Árvvoštallamis váldojuvvo vuhtii orodeami bistin sihke áššehasa dearvvašvuohtadilli.

Vealtameahttun dearvvašvuohtabálvalusat leat aŋkke:

  • bálvalusat, mat laktásit áhpehisvuhtii ja riegádahttimii (mielde lohkkon mánnárávvehat, eastadanvuohki ja áhpehisvuođa gaskkalduhttin)
  • dihto guhkesáiggebuozalmasaid ja eará buozalmasaid vealtameahttun dikšuma bálvalusat
  • dearvvašvuođa dárkkistusat, boahkuheamit ja dikšun, mat dárbbahuvvojit njoammudávddaid dihte.

Báberkeahtes mánáin lea riekti dearvvašvuohtafuolahusa bálvalusaide seamma ákkaiguin go dain mánáin, geain lea ruovttugielda Suomas. Dikšun galgá ordnejuvvot maid máná fuolaheaddjái, juos buozalmas sáhttá heajudit fuolaheaddji návcca máná dikšumis. Dákkár diliin buozalmasa dikšun sáhttá árvvoštallojuvvot vealtameahttumin máná ovddu ollahuvvama dáfus.

Dikšuma golut báberkeahtes olbmuide

Báberkeahtes olmmoš gokčá dábálaččat ieš Suomas šaddan buohccedikšuma goluid. Juos dikšuma golut eai sáhte berrojuvvot olbmos alddis, Kela (Áel) buhtte daid áššehasmávssu badjelmannai oasi almmolaš dearvvašvuohtafuolahusa bajásdoallái. Juos báberkeahtes olmmoš lea čielgasit váráheapme, almmolaš dearvvašvuohtafuolahus sáhttá luohpat goluid bearramis. Báberkeahtes olmmoš galggalii lihkka máksit álohii dearvvašvuohtafuolahusa áššehasmávssu.

Global Clinic fállá dearvvašvuođa bálvalusaid nuvttá báberkeahtes olbmuide. Klinihkat doibmet Helssegis, Turkus, Oulus, Lahtis, Tamperes ja Joensuus, ja dain barget eaktodáhtolaš doaktárat ja dikšunbargoveahka. Báberkeahtes olbmot sáhttet dikšut áššiideaset almmá dan haga, ahte sii dárbbahit čujuhit identiteahtaset, ja sin áššiiddikšun bissu luhtolažžan. Klinihka čujuhus lea suollemas ja dat muitaluvvo, go báberkeahtes olmmoš váldá oktavuođa klinihkkii.

Báberkeahtes olbmuiguin dárkkuhuvvojit máŋggat olmmošjoavkkut

Báberkeahtes olbmuiguin dehe báberkeahtes olbmuid lágáš olbmuiguin dárkkuhuvvojit máŋggat sierra olmmošjoavkkut, iige terminologiija leat stáđis. Dábálaččat báberkeahtes olbmuin dárkkuhuvvojit visot dehe muhtimat čuovvovaš olmmošjoavkkuin:

  • Olmmoš, gii oroda Suomas guhkit almmá gustojeaddji orodanlobi dehe visuma haga
  • Olmmoš, gii lea Suomas gaskaboddasaš orodanlobiin muhto sus ii leat ruovttugielda
  • EU-riikkavuloš ja su bearaslahttu, gean riikkas orrun lea lágalaš, muhto geas ii leat dáhkádusdorvu buozalmasa dehe buohccedikšuma várás.

Báberkeahtes buohccedikšunrievttit eai guoskka riikkas gaskaboddasaččat orodeddjiid (ovdamearkka turisttaid) dehe Supmii dikšuma várás ohcalan olbmuid.