Olgoriikkain orru ealáhatolmmoš

Jos orut ealáhatolmmožin bissovaččat EU- dehe Eeg-riikkas dehe Šveiccas, oaččut dikšuma iežat orrunriikkas. Jos Suoma ovddasvástádussan leat du buohccedikšuma golut, sáhtát oažžut dikšuma maid Suomas. Jos orut bissovaččat eará báikkis go EU- dehe Eeg-riikkas dehe Šveiccas, oaččut Suomas dušše hohpolaš dikšuma. Jos dus lea ruovttugielda Suomas, sáhtát geavahit buot almmolaš dearvvašvuohtafuolahusa bálvalusaid.


Suomas buot hohpolaš dikšuma dárbbašeaddjit dikšojuvvojit almmolaš dearvvašvuohtafuolahusas. Mávssát ieš hohpolaš goluid, mat šaddet hohpolaš dikšumis, jos

  • dus ii leat ruovttugielda Suomas
  • don it oro EU- dehe Eeg-riikkas dehe Šveiccas.

Suoma sosiáladorvu nohká dábálaččat, go fárret ealáhatolmmožin orrut bissovaččat olgoriikkaide. Bissovaš olgoriikkaide fárremis čuovvu maid dábálaččat, ahte dus ii leat fárrema maŋŋel ruovttugielda Suomas.

Riikkavulošvuođas, Suomas orruma áiggis dehe vearuid máksimis ii leat mearkkašupmi, go meroštallojuvvo ealáhatolbmo vuoigatvuohta geavahit Suomas almmolaš dearvvašvuohtafuolahusa bálvalusaid olgoriikkaide fárrema maŋŋel.

Orrun EU- dehe Eeg-riikkas dehe Šveiccas

EU- dehe Eeg-riikkas dehe Šveiccas bissovaččat orru ealáhatolbmos sáhttá leat EU-láhkaásaheami vuođul vuoigatvuohta geavahit buot almmolaš dearvvašvuohtafuolahusa bálvalusaid ja oažžut Áel:s buohccedikšuma buhtadusaid, vaikko son ii šat oro Suomas. Ealáhatolbmo dikšungoluid ovddasvástádus lea dábálaččat riikkas, mii máksá ealáhatolbmui ealáhaga.

Jos Suomas lea ovddasvástádus du dikšungoluin ja don orut bissovaččat nuppi EU- dehe Eeg-riikkas dehe Šveiccas, it leat oadjuduvvon buohcama várás Suomas. Don it nappo sáhte geavahit Áel-goartta. Magistráhta lea dasa lassin registreren, ahte dus ii leat ruovttugielda Suomas.

Áel mearrida, leago Suomas ovddasvástádus ealáhatolbmo dikšungoluin. Jos Suomas lea ovddasvástádus du dikšungoluin, Áel mieđiha dutnje ealáhatolbmo eurohpalaš buohccedikšungoartta. Goarttain sáhtát

  • čujuhit iežat vuoigatvuođa dikšumii almmolaš dearvvašvuohtafuolahusas, mas oaččut dikšuma seamma ládje go ruovttugieldda orru
  • geavahit iežat hálidan gieldda almmolaš dearvvašvuohtafuolahusa bálvalusaid, gos dikšun ordnejuvvo du dikšundárbbu mielde
  • oažžut njuolggobuhtadusa priváhta dearvvašvuohtafuolahusas ja ambulánsagivttas.
  • oažžut njuolggobuhtadusa dálkkasoastimiin sihke sierra- ja lassibuhtadusa Suomas orodeamát áigge iežat dárbbašan dálkasiin.

Jos mávssát ieš Suomas addojuvvon dikšuma goluid, sáhtát ohcat buohccedikšuma buhtadusaid Áel:s maŋálgihtii.

Jos orut nuppi EU- dehe Eeg-riikkas dehe Šveiccas ealáhatolmmožin ja Suomas lea ovddasvástádus du dikšungoluin, it dárbbaš ovdalobi (skovvi E 112 dehe S2) dikšuma várás, mii addojuvvo Suomas.

Jos Suopma ii govčča du dikšungoluid, oaččut dutnje ealáhaga máksi EU- dehe Eeg-riikkas dehe Šveiccas eurohpalaš buohccedikšungoartta, mainna čujuhat iežat vuoigatvuođa dikšumii Suomas.

Jos du dikšungoluid ii govčča mihkkege EU- dehe Eeg-riikkaid dehe Šveica, oaččut Suomas dušše hohpolaš dikšuma. Dalle govččat dikšungoluid ieš.

Orrun eará báikkis go EU- dehe Eeg-riikkas dehe Šveiccas

Jos orut eará báikkis go EU- dehe Eeg-riikkas dehe Šveiccas, vuođđuduvvá du vuoigatvuohta geavahit Suoma almmolaš dearvvašvuohtafuolahusa bálvalusaid duššefal dasa, leago dus ruovttugielda Suomas. Magistráhta registrere dieđu ruovttugielddas álbmotdiehtoregisttarii.

  • Jos dus lea fárremat maŋŋel Suomas ruovttugielda, sáhtát geavahit buot almmolaš dearvvašvuohtafuolahusa bálvalusaid gieldalačča áššehasmávssuin.
  • Jos dus ii leat fárrema maŋŋel ruovttugielda Suomas, sáhtát oažžut almmolaš dearvvašvuohtafuolahusas dábálaččat dušše hohpolaš dikšuma. Govččat ieš dikšungoluid.