Gaskaboddasaš orodeapmi Suomas

Oaččut almmolaš dearvvašvuohtafuolahusas hohpolaš dikšuma, jos dárbbašat dikšuma gaskaboddasaš Suomas orodeamát áigge. Jos leat boahtán Supmii nuppi EU- dehe Eeg-riikkas, Šveiccas dehe Austrálias, sáhtát oažžut maid eará dálkkasdieđalaččat vealtameahttun dikšuma, mii ii sáhte vuordit du ruoktot máhccama. Sáhtát geavahit álohii maid Suoma priváhta dearvvašvuohtafuolahusa bálvalusaid, goas mávssát ieš dikšungoluid.


Oaččut dálkkasdieđalaččat vealtameahttun dikšuma Suoma almmolaš dearvvašvuohtafuolahusas, go orodat Suomas gaskaboddasaččat ja du buohccedikšuma goluid ovddasvástádus lea nuppi EU- dehe Eeg-riikkas, Šveiccas dehe Austrálias. Mávssát dikšumis seamma áššehasmávssu go Suomas bissovaččat orru. Jos geavahat priváhta dearvvašvuohtafuolahusa bálvalusaid, oaččut Áel:s maŋálgihtii buohccedikšunbuhtadusaid.

Oaččut Suoma almmolaš dearvvašvuohtafuolahusas dušše hohpolaš dikšuma, jos orodat Suomas gaskaboddasaččat ja leat boahtán eará báikkis go EU- dehe Eeg-riikkas, Šveiccas dehe Austrálias.

Jos leat ohcalan Supmii dikšuma várás dehe du Suomas orodeami ulbmil lea dearvvašvuohtafuolahusa bálvalusaid geavaheapmi, du ovddasvástádussan lea dábálaččat gokčat ieš dikšuma goluid. Čielggat goluid buhtadusaid dan riikka eiseválddis, gean ovddasvástádussan leat du dikšuma golut.

Gaskaboddasaš orodeapmi dárkkuha orodeami, mii bistá vuollái jagi

Gaskaboddasaš orodemiin dárkkuhuvvo Suomas orodeapmi, mii bistá eanemusat ovtta jagi, ovdamearkka dihte luopmomátki dehe stuđeantalonohallan.

Jos orodeapmát Suomas bistá badjel jagi, daga fárrenilmmuhusa magistráhtii ja oza sosiáladorvui gullama Áel:s áššiid dikšunbálvalusas dehe skoviin Y 77.

Jos orodat Suomas gaskaboddasaččat ja dus leat váttis oažžut dikšuma almmolaš dearvvašvuohtafuolahusas, váldde oktavuođa

  • Áel:a riikkaidgaskasaš áššiid guovddážii, jos du ášši guoská váilevaš dikšunriekteduođaštusa
  • Rájiid rasttildeaddji dearvvašvuohtafuolahusa kontáktačuoggái, jos du ášši guoská dearvvašvuohtabálvalusaid geavahusa, dikšumii beassama dehe dikšuma ordnema Suomas.

Mii lea dálkkasdieđalaččat vealtameahttun dikšun?

Dálkkasdieđalaččat vealtameahttun dikšun dárkkuha dakkár dikšuma, mii ii sáhte vuordit du ruoktot máhccama. Gažaldat sáhttá leat ovdamearkka dihte fáhkka buohccán, guhkesáigge buozalmasa gáibidan dikšun, áhpehisvuođa čuovvun dehe riegádahttindikšun. Dikšun addojuvvo unnimusat dađi lági mielde, ahte sáhtát oadjebasat máhccat ruoktot álgoálgosaš plána mielde.

Dearvvašvuohtafuolahusa ámmátolmmoš árvvoštallá, makkár dikšuma dárbbašat ja man áigemeari siste don galggat oažžut dikšuma. Dábálaččat dikšundárbbu árvvoštallá doavttir dehe bátnedoavttir. Dikšundárbbu árvvoštallamis váldojuvvo vuhtii man guhká don orodat Suomas.

Dus lea gaskaboddasaš orodeamát áigge riekti oažžut dikšuma maiddái buozalmasaide, mat gáibidit dialysadikšuma, suvrraterapiija, spesiála ástmádikšuma dehe sytostahttadikšuma. Vuoigatvuohta lea maid váimmu gádjagovvemii, mii laktása kronalaš autoimmunábuozalmasaide.

Jos dikšuma ordnen gáibida ovddalgihtii ordnedemiid, soaba dikšumis ovddalgihtii dikšunaddiin. Ovddalgihtii soahpama gáibida ovdamearkka dihte dialysadikšun.

Nuppi EU- dehe Eeg-riikkas dehe Šveiccas orrut

Jos orut nuppi EU- dehe Eeg-riikkas dehe Šveiccas ja orodat Suomas gaskaboddasaččat, oaččut almmolaš dearvvašvuohtafuolahusas dálkkasdieđalaččat vealtameahttun dikšuma. Oaččut dikšuma seamma ládje ja seamma áššehasmávssuin go Suomas orru, go čájehat eurohpalaš buohccedikšungoartta.

Jos geavahat Suomas priváhta dearvvašvuohtafuolahusa bálvalusaid, mávssát ieš dikšuma buot goluid. Oaččut maŋálgihtii buhtadusa juogo iežat buohcanoadjolágádusas dehe Áel:s, jos leat máksán ieš Suomas addojuvvon dálkkasdieđalaččat vealtameahttun dikšuma goluid.

Áel buhtte priváhta dearvvašvuohtafuolahusas ollašuvvan goluid sihke dálkkas- ja mátkegoluid, mat laktásit dikšumii, seamma ládje go Suomas orruide.

Nuppi Davviriikkas orrut

Sáhtát čujuhit almmolaš dearvvašvuohtafuolahusas iežat vuoigatvuođa dálkkasdieđalaččat vealtameahttun dikšumii eurohpalaš buohccedikšungoartta sajis maid virggálaš identitehtaduođaštusain dehe pássain. Du bissovaš orrunčujuhus ferte leat nuppi Davviriikkas.

Nuppi Davviriikkas orrus lea vuoigatvuohta geavahit almmolaš dearvvašvuohtafuolahusas iežas giela: suoma-, ruoŧa-, dáro-, dánskka- dehe islánddagiela. Dikšunaddi ordne dárbbu mielde dulkoma.

Austrálias orrut

Jos orut bissovaččat Austrálias, dus lea Suomas orodeami áigge vuoigatvuohta oažžut dálkkasdieđalaččat vealtameahttun dikšuma almmolaš dearvvašvuohtafuolahusas. Orodeapmát lea dábálaččat gaskaboddasaš, go orodat Suomas turistan dehe stuđeantan.

Oaččut dikšuma almmolaš dearvvašvuohtafuolahusas seamma áššehasmávssuin go Suomas orru, go čájehat gustojeaddji Austrália pássa. Sáhtát čujuhit iežat vuoigatvuođa dikšumii maid eará riikka pássain, jos das boahtá ovdan gáržžitmeahttun orrunriektát Austrálias. Du bissovaš orrunčujuhus galgá leat Austrálias.

Sáhtát geavahit maid Suoma priváhta dearvvašvuohtafuolahusa bálvalusaid, mas dálkkasdieđalaččat vealtameahttun dikšuma ollašuvvan goluide oažžut buohccedikšuma buhtadusaid Áel:s.