Bargan nuppi EU- dehe Eeg-riikkas dehe Šveiccas

Go orut Suomas ja barggat nuppi EU- dehe Eeg-riikkas dehe Šveiccas, de du barganriikkastat lea ovddasvástádus buohccedikšumat goluin ja

  • sáhtát geavahit Suomas buot almmolaš dearvvašvuohtafuolahusa bálvalusaid ruovttugieldalačča áššehasmávssuin
  • oaččut Áel:s buohccedikšuma buhtadusaid
  • sáhtát geavahit iežat barganriikka dearvvašvuohtafuolahusa bálvalusaid dego doppe orrut
  • leat dábálaččat oadjuduvvon buohcama várás iežat barganriikkas
  • oaččut eurohpalaš buohccedikšungoartta iežat barganriikkas
  • oaččut buhtadusaid eará baikkes go Suomas ollašuvvan goluin iežat barganriikka buohcanoadjolágádusas.

Jos sirdásat iežat barganriikka buohcanodjui, it sáhte geavahit Áel-goartta dehe Áel:a mieđihan eurohpalaš buohccedikšungoartta.

Buohccedikšungoluid hálddašeami várás du barganriikka buohcanoadjolágádus mieđiha dutnje registrerenskovi E 106 dehe S1, man don galggat doaimmahit Áel:ii. Eiseválddit sáhttet dikšut registrerendieđuid maid njuolga. Jos du registrerenriika lea nubbi Davviriika dehe Ovttastuvvan gonagasriika, skovi registreren ii dárbbašuvvo.

Jos dus ii leat ruovttugielda Suomas, oaččut Áel:s dárbbu mielde Duođaštusa vuoigatvuođas dikšunovdamuniide Suomas. Áel sáhttá sáddet duođaštusa maid, jos dikšunaddi sáhttá oažžut dikšumat goluide stáhta buhtadusa. Go čájehat duođaštusa, de oaččut dikšuma seamma ládje go Suomas orru. Mávssát dikšumis gieldalačča áššehasmávssu. Oza duođaštusa Áel:s skoviin SV 140.

Bargan eará riikkas

Go orut Suomas ja barggat eará báikkis go EU- dehe Eeg-riikkas dehe Šveiccas, de du vuoigatvuohta geavahit almmolaš dearvvašvuohtafuolahusa bálvalusaid vuođđuduvvá magistráhta dahkan registreremii du ruovttugielddas.

  • Jos dus lea Suomas ruovttugielda, sáhtát geavahit buot almmolaš dearvvašvuohtafuolahusa bálvalusaid gieldalačča áššehasmávssuin.
  • Jos ruovttugielda ii leat, oaččut almmolaš dearvvašvuohtafuolahusas dušše hohpolaš dikšuma. Govččat ieš ollašuvvan dikšungoluid.

Áel mearrida du buohcanoajus. Jos leat oadjuduvvon buohcama várás Suomas, du anus lea Áel-goarta ja oaččut buohccedikšuma buhtadusaid Suomas ja goluin, mat leat ollašuvvan olgoriikkain. Jos it leat oadjuduvvon buohcama várás Suomas, it sáhte geavahit Áel-goartta.

Jos fárret sáddejuvvon bargin bargat Israelii ja du bargamii guoskaduvvo sosiáladorvosoahpamuš, seailluhat buohcanoaju Suomas ja sáhtát geavahit buot almmolaš dearvvašvuohtafuolahusa bálvalusaid. Oaččut dárbbu mielde Áel:s Duođaštusa vuoigatvuođas dikšunovdamuniide Suomas, mainna sáhtát čujuhit iežat vuoigatvuođa dikšumii almmolaš dearvvašvuohtafuolahusas.