Báhtareaddjit ja dorvobáikeohccit

Olmmoš oažžu geavahit buot almmolaš dearvvašvuohtafuolahusa bálvalusaid dan maŋŋel, go magistráhta lea registreren su gieldda orrun. Dát gáibida, ahte olmmoš lea ožžon jotkkolaš orodanlobi. Dat mieđihuvvo daidda olbmuide, geat bohtet Supmii dihtomearrebáhtareaddjin ja riikkaidgaskasaš suodjaleami dehe olmmošgávppi gillájeaddjin šaddama vuođul. Dorvobáikeohcciid dearvvašvuohtabálvalusaid ordnema ovddasvástádus lea vuostáváldinguovddážiin.


Báhtareaddji vuoigatvuohta dearvvašvuohtabálvalusaide

Eiseválddit čujuhit báhtareaddjistáhtusa ožžon olbmui Suomas ruovttugieldda. Go ruovttugielda lea mieđihuvvon, de báhtareaddjis lea vuoigatvuohta geavahit gieldalačča áššehasmávssuin buot almmolaš dearvvašvuohtafuolahusa bálvalusaid seamma ládje go eará olbmot geat orrot Suomas. Báhtareaddji sáhttá fárret njuolga hálus miel gildii go lea ožžon jotkkolaš orodanlobi.

Orodanlobi ožžon báhtareaddji oadjuduvvo buohcama várás Áel:a mearrádusain Suomas, ja son oažžu iežas geavahussii Áel-goartta. Báhtareaddjis lea vuoigatvuohta oažžut buohccedikšuma buhtadusaid Áel:s.

Biinniduvvon báhtareddjiin ja dorvobáikeohcciin lea vejolašvuohta oažžut dikšuma Helssegis Biinniduvvon olbmuid veajuiduhttinguovddážis ja Oulus Biinniduvvon olbmuid veajuiduhttinbálvalusaid olis.

Dorvobáikeohcciid dearvvašvuohtabálvalusat

Dorvobáikeohcciide dearvvašvuohtabálvalusaid ordnejit vuostáváldinguovddážat, maid dollet bajás stáhta, gielddat ja Suoma Rukses Ruossa (SRR). Bálvalusaid ordnema ovddasvástádus lea dan vuostáváldinguovddážis, man áššehasregisttarii olmmoš lea registrerejuvvon. Vuostáváldinguovddážiin bargá dábálaččat dearvvašvuohtadikšu ja dasa lassin vuostáváldinguovddáš oastá dearvvašvuohtafuolahusa bálvalusaid priváhtasektoris dehe gielddas dehe gieldaovttastumis.

Jos vuostáváldibálvalusaid ožžon olgoriikkalažžii ii mieđihuvvo orodanlohpi dehe su gaskaboddasaš suodjaleapmi nohká, nu vuoigatvuohta vuostáváldinbálvalusaide nohká dihto áigge geažes.

Áel:a sosiáladorvoovdamunit

Dorvobáikeohcamuša gieđahallama áigge olbmos ii leat vuoigatvuohta Áel:a ovdamuniide.

Dorvobáikeohcci sáhttá oažžut Áel:a ovdamuniid easka dalle, go sutnje lea mieđihuvvon orodanlohpi ja son gehččojuvvo orrut bissovaččat Suomas. Go dorvobáikeohcci lea ožžon orodanlobi, de son sáhttá ohcat sosiáladorvui gullama Áel:a skoviin Y77 dehe  áššiid dikšunbálvalusas.

Dorvobáikki ožžon olbmos lea vuoigatvuohta seamma Áel:a ovdamuniide ja eará sosiáladorvui dego earánai Suomas fásta orruin. Dalle olmmoš oažžu iežas atnui maiddái earret eará Áel-goartta ja eurohpalaš buohccedikšungoartta.