Juohke Eurohpa uniovnna lahttoriikkas lea iežas rájiid rasttildeaddji dearvvašvuohtafuolahusa kontáktačuokkis. Álbmotlaš kontáktačuoggáid ovddasvástádus lea rájiid rasttildeaddji dearvvašvuohtafuolahusa kommunikašuvnnas ja diehtolonohallamis.

Suomas kontáktačuokkis lea biddjon Áel:ii, man organisašuvnnas dat lea doaibman vuođđudeamis dehege jagi 2014 rájes. Kontáktačuokkis lea Áel:a riikkaidgaskasaš doaimma máhttoguovddáža doaimma oassi.

Kontáktačuoggá barggut

Rájiid rasttildeaddji dearvvašvuohtafuolahusa kontáktačuoggá bargun lea čohkket, buvttadit ja juohkit dieđu

  • Suoma dearvvašvuohtafuolahusa vuogádagas
  • dearvvašvuohtafuolahusa bálvalusain sihke daid geavaheamis, oažžumis ja visttiid easttahisvuođas
  • dikšungeavadiin ja dikšumii ohcaleami meannudemiin
  • dikšuma šlája ja dorvvolašvuođa gáibádusain ja dearvvašvuohtafuolahusa doaibmaovttadagaid bearráigeahčus ja árvvoštallamis
  • buohcci vuoigatvuođain sihke nuppástusohcan- ja njulgenmeannudemiin.

Dasa lassin kontáktačuoggá bargun lea čohkket, buvttadit ja juohkit dieđu

  • dearvvašvuohtafuolahusa bálvalusain ja daid geavaheamis EU-riikkain
  • EU-riikkas addojuvvon dearvvašvuohtafuolahusa bálvalusaid goasttádusaid buhttemis ja meannudemiin, mat daid gusket
  • eará riikkaid kontáktačuoggáin.

Kontáktačuokkis juohká dieđuid vuosttažettiin stáhtaid dearvvašvuohtabálvalusain, mat guoskadit EU-láhkaásaheami. Dat fállá dieđu maid sosiáladorvosoahpamušstáhtaid ja eará stáhtaid dearvvašvuohtafuolahusa bálvalusain sihke dearvvašvuohtafuolahusa láhkaásaheamis, hálddahuslaš meannudemiin, goasttádusain ja daid buhttemis sihke buohcci vuoigatvuođain. Sosiála- ja dearvvašvuohtaministeriija ovddasvástádussan lea rájiid rasttildeaddji dearvvašvuohtafuolahusa oppalaš plánemis, stivremis ja gárgeheamis sihke ruhtadeami bearráigeahčus.

Rájiid rasttildeaddji dearvvašvuohtafuolahusa kontáktačuokkis ii váldde vuostá iige gieđahala áššehasaid ohcamušaid. Kontáktačuokkis gaskkusta almmolaš dásis dieđu rájiid rasttildeaddji dearvvašvuohtafuolahusas, lágaid ja soahpamušaid ollašuhttimis sihke juohká dieđu riikaguovdasaš dearvvašvuohtabálvalusain ja daid geavahusas. Áel:a riikkas- ja riikiifárrema bálvalannummár 020 634 0200 (Riikkaidgaskasaš áššiid guovddáš) neavvu sosiáladorvvu gažaldagain Supmii dehe olgoriikkaide fárredettiin.

Dikšunbáikkiválljen.fi lea guovddášlaččamus bálvalankanáleamet

Rájiid rasttildeaddji dearvvašvuohtafuolahusa kontáktačuokkis bajásdoallá ja gárgeha Dikšunbáikkiválljen.fi-fierbmebálvalusa, mii lea diehtobáhkka dearvvašvuohtafuolahusa válljenfriddjavuođas Suomas ja dearvvašvuohtabálvalusaid geavaheamis olgoriikkain. Siidduin oaččut dieđu ovdamearkka dihte buohcci vuoigatvuođain, dikšungoasttádusain ja daid buhtadusain sihke dearvvašvuohtafuolahusas sierra riikkain.

Dikšunbáikkiválljen.fi-fierbmebálvalusa sáhttá oažžut njealji gillii: suoma-, ruoŧa-, eŋgelas- ja davvisámegillii. Dasa lassin fierbmebálvalusa guovddášlaččamus sisdoallu lea almmustuhtton suopmelaš ja suomaruoŧŧelaš seavagielain. Siidduin lea maid iežas oassi dearvvašvuohtafuolahusa bargiid diehtodárbbuide.

Jagi 2005 loahpas rahppojuvvon fierbmebálvalus fállá luohtehahtti dieđu, man leat buvttadan ovttasráđiid eiseválddit. Fierbmebálvalusa leat ollašuhttán rájiid rasttildeaddji dearvvašvuohtafuolahusa kontáktačuokkis, sosiála- ja dearvvašvuohtaministeriija, Dearvvašvuođa ja buresbirgejumi lágádus ja Álbmotealáhatlágádus.

Álbmotlaš ovttasbargofierpmádat

Rájiid rasttildeaddji dearvvašvuohtafuolahusa kontáktačuoggá bargu vuođđuduvvá álbmotlaš ovttasbargui. Almmolaš dearvvašvuohtafuolahusa doaibmaovttadagat, Áel, Dearvvašvuođa ja buresbirgejumi lágádus (DBL), Fimea, guovlohálddahusvirgelágádusat sihke Valvira leat geatnegahtton addit kontáktačuoggái nuvttá visot kontáktačuoggá bargguid ollašuhttima dáfus vealtameahttun dieđuid.

Rájiid rasttildeaddji dearvvašvuohtafuolahusa kontáktačuoggá olis doaibmá ovttasbargojoavku, man ovddasvástádussan lea Suoma dearvvašvuohtafuolahusvuogádaga dieđuid čohkken ja buvttadeami oktiisoabaheapmi. Ovttasbargojoavku doarju kontáktačuoggá diehtosisdoaluid válmmaštallama ja sihkkarastá, ahte diehtosisdoalut ovdanbuktojuvvojit ovttalágán ja áššehasvuđot vuogi mielde. Ovttasbargojoavkkus leat Áel:a, BDL:a, Fimea, Valvira, Buohcceoadjoguovddáža ja Suoma Gieldalihtu sihke buhcciid ovddasteaddji organisašuvnna ovddastus.

Sosiála- ja dearvvašvuohtaministeriija (SDM) olis doaibmá rájiid rasttildeaddji dearvvašvuohtafuolahusa ráđđadallangoddi, man stáhtaráđđi ásaha golmma jahkái háválassii SDM:a evttohusas. Ráđđádallangotti bargun lea bearráigeahččat rájiid rasttildeaddji dearvvašvuohtafuolahusa láhkaásaheami guoskadeami, dahkat evttohusaid ja álgagiid láhkaásaheami gárgeheami várás sihke gieđahallat eará dán lága ollašuhttima ja rájiid rasttildeaddji dearvvašvuohtafuolahusa áššiid.

Rájiid rasttildeaddji dearvvašvuohtafuolahusa bargguin ja álbmotlaš ovttasbarggus lea mearriduvvon dárkileappot lágain rájiid rasttildeaddji dearvvašvuohtafuolahusas.

Oktavuohtadieđut

Rájiid rasttildeaddji dearvvašvuohtafuolahusa kontáktačuokkis
Áel
Boastačujuhus: PL 80, 00381 Helsinki

Sáhtát sáddet šleađgaboastta kontáktačuoggái čujuhussámet  yhteyspiste(at)kela.fi

Válddáthan vuhtii, ahte šleađgaboastasáddaga diehtodorvu ii leat sihkkaraston. Sáddejeaddji ii identifiserejuvvo teknihkalaččat iige sátta čihkkojuvvo. Diehtodorvoákkaid geažil árggeslunddot dieđut, omd. persovdnadovddaldat, eai galgga sáddejuvvot šleađgaboastta bakte.