Valvira oahpista ja bearráigeahččá dearvvašvuohtafuolahusa ámmátolbmuid ja doaibmaovttadagaid barggu sihke almmolaš ja priváhta dearvvašvuohtafuolahusas. Valvira bargun lea

  •  doallat bajás registara dearvvašvuohtafuolahusa ámmátolbmuin
  • gieđahallat guoddaleami dalle, go dikšunmeattáhus eahpiduvvo váikkuhan buohcci jápmimii dehe váttes lápmahuvvamii (eará dáhpáhusas guoddalusa gieđahallá guovlohálddahusvirgedoaimmahat)
  • bearráigeahččat dikšundáhkádusa mearreáiggiid ollašuvvama.

Valvira mieđiha čuovvovaš lobiid

  •  lobiid ámmátbarganvuoigatvuođaid dearvvašvuohtafuolahusa ámmátolbmuide
  • lobiid priváhta dearvvašvuohtafuolahusa bálvalusaid buvttadeapmái dalle, go doaibman lea máŋgga guovlohálddahusa virgedoaimmahaga guovllus (eará dáhpáhusas lobi mieđiha guovlohálddahusa virgedoaimmahat)
  • Lobiid áhpehisvuođa gaskkalduhttimii ja steriliseremii dihto dáhpáhusain.

Guovlohálddahusdoaimmahagat stivrejit ja bearráigehččet dearvvašvuohtafuolahusa bálvalanbuvttadeddjiid

Guovlohálddahusdoaimmahat mieđiha lobi priváhta sosiála- ja dearvvašvuohtafuolahusa doibmii dalle, go doaibma lea dušše ovtta guovlohálddahusdoaimmahaga guovllus. Dasa lassin guovlohálddahusdoaimmahat gieđahallá guoddalusaid ja neavvu áššehasaid, juos bálvalusain dehe daid kvaliteahtas leat áššehasa mielas duođalaš váilevašvuođat.

Dearvvašvuohtafuolahusa bargoaddi galgá bearráigeahččat iežas doaimma

Dearvvašvuohtafuolahusa bargoaddiin lea vuosttaš ovddasvástádus bearráigeahččat iežas doaimma. Bargoaddi galgá bearráigeahččat ovdamearkka dihte bargiid, sajiid ja apparáhtaid. Buresbirgenguovllu ja priváhta bálvalanbuvttadeaddji ferte ráhkadit iešbearráigeahččoprográmma bargguin ja bálvalusain, mat gullet dan ovddasvástádussii.

Almmolaš dearvvašvuohtafuolahusa doaimma bearráigehččet maid gielddaid ja gieldaovttastumiid dárkkistanlávdegottit. Daid bargun lea árvvoštallat gieldda dehe gieldakonsearnna ekonomalaš ja doaibmaulbmiliid ollašuvvan. Dárkkistanlávdegoddi raportere iežas fuomášumiin gieldda dehe buohccedikšunbiirre gieldaovttastumi alimus stivrii.

Priváhta dearvvašvuohtafuolahusa fitnodagas galgá leat lohpi iežas doibmii

Priváhta dearvvašvuohtafuolahusa fitnodagas galgá leat lohpi iežas doibmii. Lobi mieđiha dat guovlohálddahusa virgedoaimmahat, man guovllus fitnodat doaibmá. Jos fitnodat doaibmá máŋgga guovlohálddahusa virgedoaimmahaga guovllus, lobi mieđiha Valvira.

Bálvalanbuvttadeaddjis galgá leat lohpeeiseválddi dohkkehan hoavda, gean ovddasvástádussan leat dearvvašvuohtabálvalusat ja dat, ahte doaibma deavdá lága gáibádusaid.

Fimea bearráigeahččá dálkkassuorggi

Dálkkassuorggi dorvvolašvuohta- ja ovddidanguovddáš Fimea bearráigeahččá Suomas dálkasiid, dálkkodanrusttegiid, varra- ja gođusbuktagiid, biobáŋkkuid sihke ovdánahttá dálkkassuorggi. Virgedoaimmahaga bargguide gullet dasa lassin dálkkassuorggi lohpe- ja bearráigeahččobarggut, dutkan- ja ovdánahttinbarggut sihke dálkkasdieđu buvttadeapmi ja gaskkusteapmi. Fimea earret eará mieđiha doaibmalobiid apteaikkaide ja čuovvu dálkasiid árrováikkuhusaid.