Dálkkasdieđalaččat vealtameahttun dikšun lea dikšun, mas mearrida doavttir dehe eará dearvvašvuohtafuolahusa ámmátolmmoš. Dat lea dikšun, man don galggat oažžut, vai sáhtát dorvvolaččat joatkit iežat orodeami čuozáhatriikkas álgoálgosaš plána mielde. Dálkkasdieđalaččat vealtameahttun dikšuma dárbu sáhttá čuožžilit fáhkkestaga buohccáma lassin maid guhkesáigge buozalmasa, áhpehisvuođa dehe riegádahttima geažil.

Gaskaboddasaš orodemiin oaivvilduvvo dábálaččat čuozáhatriikkas orodeapmi, mii bistá eanemusat jagi.

Ráhkkan dasa lassin duođaštit iežat identitehta pássain dehe virggálaš persovdnagoarttain  dikšunaddái. Fuomáš, ahte vuodjingoarta ii dábálaččat heive identitehta duođašteapmái olgoriikkain.

Áel:a mieđihan eurohpalaš buohccedikšungoarta ii atte vuoigatvuođa dikšumii eará go EU- dehe Eeg-riikkas dehe Šveiccas

Eurohpalaš buohccedikšungoarta (Áel)

Oaččut eurohpalaš buohccedikšungoartta iežat buohcanoadjolágádusas

Eurohpalaš buohccedikšungoartta mieđiha riika, gos leat oadjuduvvon buohcama várás dehe man ovddasvástádussan leat du buohccedikšuma golut. Goarta lea persovnnalaš dehege juohkeokta dárbbaša iežas goartta. Easkariegádan mánná oažžu dikšuma eatni eurohpalaš buohccedikšungoarttain.

Suomas goartta mieđiha Áel. Oza eurohpalaš buohccedikšungoartta Áel:s

Goarta lea nuvttá. Áel doaimmaha dutnje goartta ruoktot reiveboastan sulaid vahku geahčen diŋgojumis.

Eurohpalaš buohccedikšungoarta lea standardiserejuvvon EU:s. Dan diehtosisdoalut leat ovttalágánat buot gielain. Guhtenai riika mieđiha goartta iežas virggálaš gielain. Goarta sáhttá leat sierra iežas goarta dehe dat sáhttá ovttastahttojuvvot riikka buohcanoadjogortii.

Áela:a mieđihan goarta lea

  • alitivdnásaš, guovttebeallásaš plastihkkagoarta
  • suoma- dehe ruoŧagielalaš
  • vuoimmis eanemusat guokte jagi háválassii.

Áel sádde du ruovttubostii automáhtalaččat ođđa goartta, sulaid mánu ovdal boares goartta vuoimmisorrunáiggi dievvama.

Eurohpalaš buohccedikšungoarta lea namas mielde

  • eŋgelasgillii European Health Insurance Card
  • Suomas ruoŧagillii Europeiskt sjukvårdskortet
  • eará riikkain ruoŧagillii Europeiska sjukförsäkringskortet
  • fránskkagillii Carte européenne d’assurance maladie
  • duiskkagillii Europäische Krankenversicherungskarte
  • spánskagillii Tarjeta Sanitaria Europea.

Goarttas adnojuvvo dávjá eŋgelasgiel oanádus EHIC ja das hubmojuvvonai dávjá EHIC-goartan (EHIC-card).

Jos dus ii leat goarta

Jos it háhppet oažžut goartta ovdal mátkái vuolgima dehe don leat juo olgoriikkain ja dus ii leat eurohpalaš buohccedikšungoarta, sáhtát oažžut Áel:a riikkaidgaskasaš áššiid guovddážis goartta gaskaboddasaččat buhttejeaddji duođaštusa

  • suoma- ja eŋgelasgiel telefonbálvalus +358 20 634 0200
  • ruoŧagiel telefonbálvalus +358 20 634 0300
  • nummáriin bálvaluvvo árgabeivviid (Suoma áigge) d. 8–18.

Jos don leat buohcceviesus nuppi EU- dehe Eeg-riikkas dehe Šveiccas, Áela:a riikkaidgaskasaš áššiid guovddáš sáhttá doaimmahit duođaštusa njuolga buohccevissui. Maiddái dikšuma addi buohcceviessu sáhttá du beales sihtat Áel:a doaimmahit duođaštusa, mii buhtte eurohpalaš buohccedikšungoartta.

Gaskaboddasaš duođaštusain oaččut dikšuma seamma ládje go eurohpalaš buohccedikšungoarttain. Duođaštus lea nuvttá ja dat lea vuoimmis olgoriikkain orodeamát áigge, goitge eanemusat ovtta jagi.

Duođaštus lea A4-sturrosaš báberhápmásaš EU:s standardiserejuvvon skovvi. Áel doaimmaha duođaštusa dábálaččat suomagielalažžan.

Eurohpalaš buohccedikšungoarta adnojuvvo dušše almmolaš dearvvašvuohtafuolahusas

Eurohpalaš buohccedikšungoarta dohkke čuozáhatriikka báikkálaš almmolaš dearvvašvuohtafuolahusas. Sáhtát geavahit goartta, go dikšunaddi gullá čuozáhatriikka almmolaš dearvvašvuohtafuolahusa vuogádahkii dehe dat lea dahkan soahpamuša čuozáhatriikka láhkaásahan buohcanoadjovuogádagain. Go geavahat goartta, mávssát dikšumis seamma áššehasmávssu go báikkálaš áššehasat danveardásaš dilis. Dikšumis ollašuvvan golut berrojuvvojit maŋálgihtii Áel:s dehege it šatta máksit daid ieš. Áel buhtte goluid dikšuma addán riikii.

Čájet eurohpalaš buohccedikšungoartta dakkaviđe dikšumat álggus dikšunaddái.

Jos dikšunaddi ii dohkket eurohpalaš buohccedikšungoartta, sáhtát čilget goartta dohkálašvuođa čuozáhatriikka buohcanoadjolágádusas. Dikšunaddi sáhttá leat čuozáhatriikkas priváhta dearvvašvuohtafuolahusa bálvalanbuvttadeaddji, mas eurohpalaš buohccedikšungoarta ii leat anus.

Jos it oaččo dálkkasdieđalaččat vealtameahttun dikšuma eurohpalaš buohccedikšungoarttain čuozáhatriikka almmolaš dearvvašvuohtafuolahusas, sáhtát čielggadit ášši Eurohpa komišuvnna SOLVIT-bálvalusa bakte. SOLVIT muitala eiseválddiide, mat vuoigatvuođaid nuppi EU-riikkas boahttiin leat, ja veahkeha problemadáhpáhusaid čoavdimis.

Loga lasi SOLVIT –bálvalusas čujuhusas www.solvit.eu.

Jos dikšunaddi, čuozáhatriikka buohcanoadjolágádus dehe eará eiseváldi sihtá dus eará duođaštusa dikšuma várás, váldde oktavuođa Áel:a riikkaidgaskasaš áššiid guovddážii.

Jos šattat ieš máksit dikšuma goluid, sáhtát ohcat goluide buhtadusaid maŋálgihtii čuozáhatriikka buohcanoadjolágádusas eurohpalaš buohccedikšungoartta vuođul. Sáhtát ohcat buhtadusaid maŋálgihtii maid Áel:s skoviin SV 128.