Ovdalobi mieđiheami kritearain dehe vejolašvuođas guođđit ovdalobi mieđitkeahttá lea mearriduvvon EU-láhkaásaheamis. Go mearriduvvo ovdalobis, de váldojuvvo vuhtii álohii ohcci dearvvašvuohtadilli ja buozalmasa jáhkehahtti ovdáneapmi.

Kela ferte mieđihit ovdalobi, jos čuovvovaš eavttut ollašuvvet

  • du dikšundárbu lea dálkkasdieđalaččat ákkastallon
  • dus livččii Suomas vuoigatvuohta almmolaš dearvvašvuohtafuolahusas namuhuvvon dikšumii
  • Suomas ii bastte lágiduvvot dutnje dikšun dáhkádusáiggi olis.

Ovdalohpi sáhttá hilgojuvvot, jos

  • dikšun ii ordnejuvvo dehe addojuvvo almmolaš dearvvašvuohtafuolahusas
  • almmolaš  dearvvašvuohtafuolahus sáhttá lágidit dikšuma dehe dávisteaddji dikšuma Suomas dáhkádusáiggi olis.

Maid mun galggan bargat, go vuolggán ovdalobiin olgoriikkaide dikšuma várás?

  1. Oza alccesat heivvolaš dikšunaddi ja čielggat, dohkkehago dat ovdalobi.  Sihkarastte, ahte dikšunbáiki doaibmá áššáigullevaš lobiiguin gažaldatvuloš riikkas.
  2. Oza ovdalobi Kelas. Kela mieđiha lobi, jos almmolaš dearvvašvuohtafuolahus bealušta dan.
  3.  Soaba dikšunaddiin ordnedemiin, mat laktásit dikšuma oažžumii.
  4. Doaimmat dárbbašlaš buohcceáššegirjjiid dikšunaddái ja jorgalahte daid dárbbu mielde gillii, man dikšunaddi ipmirda. Buohccedieđu arkiivii (KanTa) furkejuvvon dieđuidat sáhtát dárkkistit Iežasfuorká-bálvalusas Omakanta.fi.
  5. Váldde mátkái fárrui Kela sádden ovdalohpeskovi.
  6. Mávssát dikšumis báikkálaš áššehasmávssu. Mátkkiin, dálkasiin ja orodeamis sáhtát ohcat maŋálgihtii buhtadusaid Kelas. Muhtin diliin sáhtát ohcat buhtadusa maid mieđušteaddji goluin.
  7. Muitte, ahte dikšun addojuvvo iešguđege riikka álbmotlaš láhkaásaheami ja dearvvašvuohtafuolahusa vuogádaga mielde.
  8. Buohccevahágiidda guoskaduvvo dikšunaddi riikka lágas ásahuvvon buohccedáhkádus. It sáhte oažžut Suomas buhtadusaid olgoriikkain šaddan buohccevahágii, muhto buhtadus galgá ohccojuvvot riikkas, mii lea addán dikšuma. Vejolaš dálkkasdieđalaš joatkkadikšun sáhttá goitge addojuvvot Suomas.

Oza ovdalobi Kelas

Suomas ovdalohpi ohccojuvvo Kelas. Suomagiel rávvagiid ovdalobi ohcamii gávnnat Kela siidduin. Kela riikkaidgaskasaš áššiid guovddáš veahkeha dárbbu mielde ovdalobi ohcamis.