Jos fárret Suomas olgoriikkaide stuđeret dehe joatkkastuđeret dehe bargat bálkkáhis hárjehallama dehe dutkamuša, de gulat dábálaččat Suoma buohcanoaju ollái. EU- dehe Eeg-riikkas dehe Šveiccas oaččut dikšuma eurohpalaš buohccedikšungoarttain. Jos vuolggát EU-riikkaid olggobeallái, lea ávžžuhahtti váldit priváhtadáhkádusa buohccáma várás.

Jos fárret olgoriikkaide bargat stuđeremiid hárjehallama, mas lea bálká, de das sáhttá leat váikkuhus oadjudeapmásat buohcama várás Suomas.

Bargga vuolggedettiinat ná:

  1. Olgoriikkaide fárremis ferte ilmmuhit Áel:ii, jos dutnje máksojuvvo juoga Áel:a ovdamunni dehe juos dus lea eurohpalaš buohccedikšungoarta.
  2. Ilmmut Áel:ii álohii, jos barggat olgoriikkain.
  3. Daga fárrenilmmuhusa maid magistráhtii.

Fárren vuollái guđa mánnui EU- dehe Eeg-riikii dehe Šveicii

Dikšun ođđa riikkas: Oaččut dálkkasdieđalaččat vealtameahttun dikšuma vuollái guđa mánnui nuppi EU- ja Eeg-riikkas ja Šveiccas orodeamát áigge, go čájehat eurohpalaš buohccedikšungoartta.

Dikšun Suomas: Suomas oaččut dikšuma seamma ládje go ovdalnai. Ruovttugieldalažžan dus lea riekti atnit almmolaš dearvvašvuohtafuolahusa bálvalusaid. Jos anát priváhta dearvvašvuohtafuolahusa bálvalusaid, oaččut Áel-goarttain dain Áel-buhtadusaid.

Fárren badjel guđa mánnui EU- dehe Eeg-riikii dehe Šveicii

Dikšun ođđa riikkas: Jos orut nuppi EU- dehe Eeg-riikkas dehe Šveiccas badjel guhtta mánu oahpuidat dihte, oaččut dálkkasdieđalaččat vealtameahttun dikšuma. Don galggašit oažžut iežat dárbbašan buohccedikšuma eurohpalaš buohccedikšungoarttain. Dikšuma oažžun sáhttá goitge gáibidit registrerema báikkálaš buohcanoadjolágádusas.

Dikšun Suomas: Jos orut bissovaččat nuppi EU- dehe Eeg-riikkas dehe Šveiccas iežat stuđeremiid áigge ja Suomas lea ovddasvástádus buohccedikšumat goluin, oaččut dikšuma Suomas seamma ládje go ovdalnai. Jos du ruovttugielda ii seaillo Suomas, dárbbašat Áel:a mieđihan duođaštusa vuoigatvuođas dikšunovdamuniide Suomas, mainna čájehat iežat vuoigatvuođa dikšumii almmolaš dearvvašvuohtafuolahusas.  Jos geavahat priváhta dearvvašvuohtafuolahusa bálvalusaid, oaččut Áel-goarttain dain Áel-buhtadusaid. Áel mieđiha dárbbašlaš dikšunriekteduođaštusaid, go ilmmuhat fárremisttát Áel:ii.

Fárren stuđeantan dehe dutkin Kanada Quebecii

Dikšun ođđa riikkas: Suoma ja Kanada Quebeca sosiáladorvvu sosiáladorvosoahpamušordnedeapmi guoská doavtter- ja buohcceviessodutkama, sihke muhtin muddui bátnedikšuma, mii addojuvvo Quebecas. Soahpamuša vuođul dikšuma sáhttet Quebecas oažžut dohko gaskaboddasaččat fárrejeaddji

  • stuđeantalonohalli dehe dutkkusstuđeanta
  • dutki
  • stuđeanta, gii ollašuhttá nuppi dási oahpu dehe allaskuvlaoahpuid hárjehallama
  • bearašlahttu, gii fárre ovdal namuhuvvon olbmo mielde.

Dikšuma oažžun gáibida, ahte registreret iežat vuohččan Quebeca buohcanoadjolágádusas. Sáhtát ohcat registrerenskovi friddjahápmásaččat Áel:a áššiiddikšunbálvalusas, telefuvnna bakte dehe Áel:a doaimmahagas. Quebeca buohcanoadjolágádus bidjá eaktun maid gustojeaddji riikiiboahtináššegirjji. Dasa lassin stuđeanttas ja dutkis  gáibiduvvo duođaštus iežas čáliheamis stuđeantan (ovdamearkka dihte oahppolágádusa mieldeorrunduođaštus) dehe dohkkeheamis dutkin dehe hárjehallin.

Dikšun Suomas: Jos fárret Quebecii vuollái guđa mánnui, oaččut Suomas dikšuma seamma ládje go ovdalnai. Ruovttugieldalažžan dus lea riektit atnit almmolaš dearvvašvuohtafuolahusa bálvalusaid. Jos geavahat priváhta dearvvašvuohtafuolahusa bálvalusaid, oaččut Áel-goarttain dain Áel-buhtadusaid.

Jos fárret Quebecii badjel guđa mánnui ja oadjudeapmát buohcama várás Suomas nohká, iige dus leat ruovttugielda Suomas, de don leat vuoigadahtton Suomas duššefal hohpolaš dikšumii. Govččat ieš dikšungoluid. Jos seaillut oadjuduvvon buohcama várás Suomas, de sáhtát oažžut Áel-buhtadusaid priváhta dearvvašvuohtafuolahusas. Áel mieđiha dárbbašlaš  dikšunriekteduođaštusaid, go ilmmuhat fárremisttát Áel:ái. Jos dus seailu ruovttugielda Suomas, oaččut dikšuma Suoma almmolaš dearvvašvuohtafuolahusas ruovttugieldalačča áššehasmávssuin dego ovdalnai.

Fárren stuđeantan dehe dutkin EU-riikkaid olggobeallái

Dikšun ođđa riikkas: Go orodat stuđeantan dehe dutkin eará báikkis go EU- dehe Eeg-riikkas dehe Šveiccas, oaččut dikšuma orodanriikka báikkálaš láhkaásaheami mielde. Eará báikkis go EU- dehe Eeg-riikkas dehe Šveiccas, govččat dábálaččat ieš dikšuma goluid. Čielggat ovddalgihtii dárbbašatgo priváhta dáhkádusa dearvvašvuohtabálvalusaid geavaheami várás. Jos seaillut oadjuduvvon buohcama várás Suomas, de sáhtát ohcat Áel:s buhtadusa fáhkka buohccámis. Buhtadusat leat seammalágánat go priváhta  dearvvašvuohtafuolahusa buhtadusat Suomas.

Dikšun Suomas: Jos fárret EU-riikkaid olggobeallái vuollái guđa mánnui, oaččut Suomas dikšuma seamma ládje go ovdalnai. Ruovttugieldalažžan dus lea vuoigatvuohta atnit almmolaš dearvvašvuohtafuolahusa bálvalusaid. Jos anát priváhta dearvvašvuohtafuolahusa bálvalusaid, oaččut Áel-goarttain dain Áel-buhtadusaid.

Jos fárret EU-riikkaid olggobeallái badjel guđa mánnui ja oadjudeapmát buohcama várás nohká Suomas, iige dus leat ruovttugielda Suomas, de don leat vuoigadahtton Suomas duššefal hohpolaš dikšumii. Govččat ieš dikšungoluid. Jos seaillut Suomas oadjuduvvon buohcama várás, de sáhtát oažžut Áel-buhtadusaid priváhta dearvvašvuohtafuolahusas. Jos dus seailu ruovttugielda Suomas, oaččut dikšuma Suoma almmolaš dearvvašvuohtafuolahusas ruovttugieldalačča áššehasmávssuin dego ovdalnai.