Fárren olgoriikkaide bargin dehe fitnodatolmmožin

Go vuolggát bargin nuppi EU- dehe Eeg-riikii dehe Šveicii, de sirdásat dábálaččat barganriikka buohcanoaju ollái. Jos barggat suopmelaš bargoaddi bálvalusas (sáddejuvvon bargin) nuppi EU- dehe Eeg-riikkas dehe Šveiccas, de don leat dábálaččat oadjuduvvon buohcama várás Suomas. Go vuolggát bargui Eurohpa olggobeallái, čielggat iežat buohcanoaju ja dearvvašvuohtafuolahusa bálvalusaid geavahusa čuozáhatriikkas.


Ilmmut fárremisttát eiseválddiide

  • Ilmmut olgoriikkain orrumis ja bargamis Áel:ii.
  • Jos fárret olgoriikkaide orrut, daga fárrenilmmuhusa maid magistráhtii sihke ođđa riikka sosiáladorvolágádussii.
  • Jos vuolggát suopmelaš bargoaddi bálvalussii olgoriikkaide, čielggat olgoriikka barggu oadjudeami áššiid Ealáhatdorvoguovddážis.

Báikkálaš bargoaddi bálvalusas nuppi EU- dehe Eeg-riikkas dehe Šveiccas

Dikšun ođđa riikkas: Jos fárret EU- dehe Eeg-riikii dehe Šveicii bargat báikkálaš bargoaddi bálvalussii, de sirdásat dábálaččat barganriikka buohcanoaju ollái. Bargin oaččut dábálaččat dikšuma barganriikkas seamma ládje ja seamma haddái go riikkas orrut, go leat vuohččan registreren iežat báikkálaš buohcanoadjolágádusas. Barganriikkastat oaččut dikšuma dan láhkaásaheami ja vuogádaga mielde.

Čielggat iežat bargoaddis ja čuozáhatriikka buohcanoadjolágádusas iežat buohcanoaju ordnema. Muhtin riikkain leat máŋga láhkaásahan buohcanoaju hálddašeaddji lágádusa, main sáhtát ieš válljet iežat dáhkádusdorvvu. Mávssát dábálaččat ieš buohcanoadjomávssu, mii sáhttá leat mihá divrasit go danveardásaš máksu Suomas.

Buohcanoadjolágádusain leat dávjá soahpamušat báikkálaš dearvvašvuohtafuolahusa doibmiiguin, goas oaččut dikšuma soahpamušhattiin. Du buohcanoadjolágádus mieđiha dutnje dábálaččat áššegirjji, mainna sáhtát čujuhit iežat vuoigatvuođa dikšumii barganriikkas. Diehtu du oadjudeamis buohcama várás sáhttá leat báikkálaš dearvvašvuohtafuolahusa doibmiid anus maid diehtovuogádagas.

Dikšun Suomas: Du barganriikka buohcanoadjolágádus mieđiha dutnje eurohpalaš buohccedikšungoartta, mainna čujuhat iežat vuoigatvuođa dikšumii eará EU-, dehe Eeg-riikkain ja Šveiccas. Jos dárbbašat dikšuma Suomas, čujut iežat vuoigatvuođa dikšumii du barganriikka mieđihan eurohpalaš buohccedikšungoarttain. Jos dus ii leat Suomas ruovttugielda, oaččut almmolaš dearvvašvuohtafuolahusas dálkkasdieđalaččat vealtameahttun dikšuma Suomas orodeamát áigge. Jos geavahat priváhta dearvvašvuohtafuolahusa dálkkasdieđalaččat vealtameahttun dikšuma oažžuma várás, sáhtát ohcat buhtadusaid Áel:s maŋálgihtii.

Jos dus lea Suomas ruovttugielda, sáhtát geavahit buot almmolaš dearvvašvuohtafuolahusa bálvalusaid gieldalačča áššehasmávssuin. Dalle don it dárbbaš čájehit eurohpalaš buohccedikšungoartta.

Mearra- dehe rádjebargin nuppi EU- dehe Eeg-riikkas dehe Šveiccas

Jos barggat nuppi EU- dehe Eeg-riikkas dehe Šveiccas, muhto orut Suomas, gulat dábálaččat barganriikkat buohcanoaju ollái. Dus lea riekti buot iežat dárbbašan buohccedikšumii sihke barganriikkastat ja Suomas. Oaččut dikšuma goappánai riikkas báikkálaš áššehasmávssu hattiin. Suomas dus lea maid riekti buhtadussii priváhta dearvvašvuohtafuolahusa, dálkkasoastimiid ja buozalmasa dikšuma geažil dahkkon mátkkiid goluin.

Dasa lassin, jos leat álggahan buozalmasa dikšuma barganriikkastat ovdal go bázát ealáhahkii, de dus lea vuoigatvuohta joatkit namuhuvvon buozalmasa dikšuma barganriikkastat ealáhahkii báhcima maŋŋel. Siđa dalle dán dikšuma várás sierra dikšunriekteduođaštusa dan riikka buohcanoadjolágádusas, mas lea ovddasvástádus buohccedikšumat goluin go leat ealáhagas. Dikšunriekteduođaštusain oaččut joatkit dikšuma boares barganriikkastat.

Suopmelaš bargoaddi bálvalusas nuppi EU- dehe Eeg-riikkas dehe Šveiccas

Dikšun ođđa riikkas: Jos suopmelaš bargoaddi sádde du bargat nuppi EU- dehe Eeg-riikii dehe Šveicii, seaillut dábálaččat Suoma buohcanoajus. Ealáhatdorvoguovddáš lea Suomas doaibmaválddálaš eiseváldi, mii mearrida guoskaduvvogo du barganáiggistat Suoma sosiáladorvvu láhkaásaheapmi. Mearrádus dahkkojuvvo du bargoaddi dehe iežat ohcamuša vuođul.

Jos don leat oadjuduvvon buohcama várás Suomas olgoriikkain bargamat áigge, de Suopma gokčá du buohccedikšuma goluid. Oaččut Áel:as mearrádusa dikšunrievttis.

  • Vuollái guhtta mánu bisti barganáigodaga áigge oaččut barganriikkastat dikšuma Áel:a mieđihan eurohpalaš buohccedikšungoarttain.
  • Badjel guhtta mánu bisti barganáigodahkii dikšuma oažžun gáibida dábálaččat du registrerema barganriikka buohcanoadjolágádusas.

Dikšun Suomas: Go Suoma ovddasvástádussan lea buohccedikšumat golut, de sáhtát geavahit maid Suomas buot almmolaš dearvvašvuohtafuolahusa bálvalusaid ja oažžut Áel-buhtadusa priváhta dearvvašvuohtabálvalusaid anus. Mávssát bálvalusaid geavaheamis gieldalačča áššehasmávssu. Das ii leat mearkkašupmi, leago dus ruovttugielda Suomas. Jos dus ii leat Suomas ruovttugielda, Áel mieđiha dutnje Duođaštusa vuoigatvuođas dikšunovdamuniide Suomas.

Bargin Kanada Quebecii

Dikšun ođđa riikkas: Jos fárret gaskaboddasaččat bargin dehe sáddejuvvon bargin Kanada Quebecii, oaččut dárbbu mielde doavtter- ja buohcceviessodikšuma sihke muhtin muddui bátnedikšuma seamma ládje go Quebecis oadjuduvvon olbmot buohcama várás. Dikšuma oažžun gáibida, ahte registreret iežat vuohččan Quebeca buohcanoadjolágádusas.

Dikšun Suomas: Jos fárret gaskaboddasaččat bargin Kanada Quebecii, seaillut Suomas oadjuduvvon buohcama várás ja oaččut Áel-buhtadusaid priváhta dearvvašvuohtafuolahusa geavahusas.  Jos dus lea ruovttugielda Suomas, oaččut dikšuma almmolaš dearvvašvuohtafuolahusas seamma ládje go ovdalnai. Jos fárret bissovaččat Quebecii, Suoma ja Quebeca gaskasaš sosiáladorvoortnet ii atte rivttiid dikšumii Suomas. Jos dus ii leat Suomas ruovttugielda, oaččut almmolaš dearvvašvuohtafuolahusas dušše hohpolaš dikšuma. Govččat ieš goluid iežat oažžun dikšumis.

Bargin Israelii

Dikšun ođđa riikkas: Jos fárret bargat Israelii, oaččut doppe bálvalusaid našuvnnalaš lágaid ja ortnega mielde. Čielggat ovddalgihtii, makkár dikšumii dus lea vuoigatvuohta ja gáibidago dikšuma oažžun ovdamearkka dihte priváhta dáhkádusa.

Dikšun Suomas: Seaillut Suoma buohcanoaju olis ja sáhtát  geavahit buot almmolaš dearvvašvuohtafuolahusa bálvalusaid go leat

  • sáddejuvvon bargi
  • virgeolmmoš dehe danveardásaš almmolaš sektora barggus bargi
  • Israelis bargi fievrovuoddji, man fievrru eaiggátfitnodaga ruovttubáiki lea Suopma
  • Suoma leavgga vuolde, muhto Israela guovllus skiipastalli dámppa mearrabargi
  • ovdal namuhuvvon olbmo mielde fárrejeaddji bearašlahttu.

Bargin eará riikkaide

Dikšun ođđa riikkas: Du vuoigatvuohta oažžut dikšuma ja geavahit dearvvašvuohtafuolahusa bálvalusaid barganriikkastat vuođđuduvvá barganriikkat láhkaásaheapmái. Čielggat ovddalgihtii, makkár dikšumii dus lea vuoigatvuohta ja gáibidago dikšuma oažžun ovdamearkka dihte priváhta dáhkádusa.

Dikšun Suomas: Go barggat eará go EU- dehe Eeg-riikkas dehe Šveiccas, du oadjudeapmái buohcama várás Suomas váikkuha dábálaččat olgoriikkain orodeapmi bistin. Ilmmut Áel:ii álohii olgoriikka bargamis.

  • Jos leat oadjuduvvon buohcama várás Suomas olgoriikkain bargamat áigge, sáhtát geavahit Suomas Áel-goartta ja oaččut buohccedikšunbuhtadusaid priváhta dearvvašvuohtabálvalusaid geavaheamis.

Du vuoigatvuohta geavahit Suomas almmolaš dearvvašvuohtafuolahusa bálvalusaid vuođđuduvvá magistráhta dahkan registreremii ruovttugielddas. Du ruovttugielda seailu dábálaččat Suomas, jos orodat olgoriikkain vuollái jagi.

  • Jos dus ii leat Suomas ruovttugielda, oaččut almmolaš dearvvašvuohtafuolahusas dušše hohpolaš dikšuma. Govččat ieš hohpolaš dikšuma goluid.
  • Jos dus lea Suomas ruovttugielda, sáhtát geavahit buot iežat ruovttugieldda almmolaš dearvvašvuohtafuolahusa bálvalusaid.