Fárren bargin

Go vuolggát bargin nuppi EU- dehe Eeg-riikii dehe Šveicii, de sirdásat dábálaččat barganriikka buohcanodjui. Jos barggat suopmelaš bargoaddi bálvalusas nuppi EU- dehe Eeg-riikkas dehe Šveiccas, don leat dábálaččat oadjuduvvon buohcama várás Suomas. Go vuolggát bargui Eurohpa olggobeallái, čielggat iežat buohcanoaju ja dearvvašvuohtafuolahusa bálvalusaid geavahusa čuozáhatriikkas.


Ilmmut álohii magistráhtii ja Áel:ii iežat sirdáseamis bargat olgoriikkaide dehe jos muđuid fárret olgoriikkaide orrut badjel golmma mánnui.

Ilmmut olgoriikkain orrumis ja bargamis Áel:ii. Sáhtát dahkat ilmmuhusa Áel:a áššiid dikšunbálvalusas dehe skoviin Y 38. Jos muotkkut olgoriikkaide orrut, daga fárrenilmmuhusa maiddái magistráhtii. Čielggat olgoriikka barggu dáhkádusa áššiid maid Ealáhatdorvoguovddážis.

Bargin EU- dehe Eeg-riikii dehe Šveicii

Jos fárret EU- dehe Eeg-riikii dehe Šveicii bargat báikkálaš bargoaddi bálvalussii, de sirdásat dábálaččat barganriikkabuohcanodjui. Bargin oaččut dábálaččat dikšuma barganriikkas seamma ládje ja seamma haddái go riikkas orrut, go leat vuohččan registreren iežat báikkálaš buohcanoadjolágádusas.

Barganriikkastat oaččut dikšuma dan láhkaásaheami ja vuogádaga mielde. Dearvvašvuohtafuolahusa bálvalusat leat sierralágánat sierra riikkain ja dikšun sáhttá leat sierrahattát go danveardásaš dilis Suomas. Go leat oadjuduvvon buohcama várás bargin nuppi EU-, dehe Eeg-riikkas dehe Šveiccas, oaččut iežat dárbbašan dikšuma vuosttaš sajis barganriikkastat. Dalle buohcanoadju dárkkuha dábálaččat maid vuoigatvuođa geavahit barganriikka dearvvašvuohtafuolahusa bálvalusaid.

Čielggat iežat bargoaddis ja čuozáhatriikka buohcanoadjolágádusas iežat buohcanoaju ordnema. Muhtin riikkain leat máŋga láhkaásahan buohcanoaju hálddašeaddji lágádusa, main sáhtát ieš válljet iežat dáhkádusdorvvu. Mávssát dábálaččat ieš buohcanoadjomávssu, mii sáhttá leat mihá divrasit go danveardásaš máksu Suomas.

Buohcanoadjolágádusain leat dávjá soahpamušat báikkálaš dearvvašvuohtafuolahusa doibmiiguin, goas oaččut dikšuma soahpamušhattiin. Du buohcanoadjolágádus mieđiha dutnje dábálaččat áššegirjji, mainna sáhtát čujuhit iežat vuoigatvuođa dikšumii barganriikkas. Diehtu du oadjudeamis buohcama várás sáhttá leat báikkálaš dearvvašvuohtafuolahusa doibmiid anus maid diehtovuogádagas.

Du barganriikka buohcanoadjolágádus mieđiha dutnje eurohpalaš buohccedikšungoartta, mainna čujuhat iežat vuoigatvuođa dikšumii eará EU-, dehe Eeg-riikkain ja Šveiccas.

  • Jos dárbbašat dikšuma Suomas, čujut iežat vuoigatvuođa dikšumii du barganriikka mieđihan eurohpalaš buohccedikšungoarttain.
  • Jos dus ii leat Suomas ruovttugielda, oaččut almmolaš dearvvašvuohtafuolahusas dálkkasdieđalaččat vealtameahttun dikšuma Suomas orodeamát áigge.
  • Jos dus lea Suomas ruovttugielda, sáhtát geavahit buot almmolaš dearvvašvuohtafuolahusa bálvalusaid gieldda orrun.

Suopmelaš bargoaddi bálvalusas nuppi EU- dehe Eeg-riikkas dehe Šveiccas

Jos suopmelaš bargoaddi sádde du bargat nuppi EU- dehe Eeg-riikii dehe Šveicii, seaillut dábálaččat Suoma buohcanoajus. Ealáhatdorvoguovddáš lea Suomas doaibmaválddálaš eiseváldi, mii mearrida guoskaduvvogo du barganáiggistat Suoma sosiáladorvvu láhkaásaheapmi. Mearrádus dahkkojuvvo du bargoaddi dehe iežat ohcamuša vuođul.

Jos don leat oadjuduvvon buohcama várás Suomas olgoriikkain bargamat áigge, de Suopma gokčá du buohccedikšuma goluin. Oaččut Áel:as mearrádusa buohcanoajus ja Suoma sosiáladorvvu láhkaásaheami guoskadeamis.

  • Vuollái jagi bisti barganáigodaga áigge oaččut barganriikkastat dikšuma Áel:a mieđihan eurohpalaš buohccedikšungoarttain.
  • Badjel jagi bisti barganáigodahkii dikšuma oažžun gáibida dábálaččat du registrerema barganriikka buohcanoadjolágádusas Áel:a mieđihan skoviin E 106 dehe S1.

Go Suoma ovddasvástádussan lea buohccedikšumat golut, de sáhtát geavahit maid Suomas buot almmolaš dearvvašvuohtafuolahusa bálvalusaid. Mávssát bálvalusaid geavaheamis gieldalačča áššehasmávssu. Das ii leat mearkkašupmi, leago dus ruovttugielda Suomas.

  • Jos dus ii leat Suomas ruovttugielda, Áel mieđiha dutnje Duođaštusa vuoigatvuođas dikšunovdamuniide Suomas.

Sáddejuvvon bargoaddi mielde nuppi EU- dehe Eeg-riikii dehe Šveicii fárrejeaddji bargoeallima olggobeale bearašlahttu bissu dábálaččat Suoma buohcanoaju olis.

  • Bearašlahttu galgá ilmmuhit muotkumis Áel:ii áššiid dikšunbálvalusas dehe skoviin Y 38.
  • Jos Suopma gokčá maid bearašlahtu goluid, bearašlahtus lea seammalágán vuoigatvuohta dikšumii go sáddejuvvon bargis.

Bargin Kanada Quebecii dehe Israelii

Jos fárret gaskaboddasaččat bargin dehe sáddejuvvon bargin Kanada Quebecii, oaččut dárbbu mielde doavtter- ja buohcceviessodikšuma sihke muhtin muddui bátnedikšuma seamma ládje go Quebecas oadjuduvvon olbmot buohcama várás. Vuoigatvuohta guoská maid fárustat fárrejeaddji bearašlahtu. Dikšuma oažžun gáibida, ahte registreret iežat vuohččan Quebeca buohcanoadjolágádusas. Registrerema várás

  • Ealáhatdorvoguovddáš mieđiha skovi SF/Q1 sáddejuvvon bargái
  • Áel mieđiha skovi SF/Q4 bargái, stuđentii, dutkái sihke eará bearašlahtuide.

Jos fárret bargat Israelii, don leat ain oadjuduvvon buohcama várás Suomas ja sáhtát geavahit buot almmolaš dearvvašvuohtafuolahusa bálvalusaid go leat

  • sáddejuvvon bargi
  • virgeolmmoš dehe danveardásaš almmolaš sektora barggus bargi
  • Israelis bargi fievrovuoddji, man fievrru eaiggátfitnodaga ruovttubáiki lea Suopma
  • Suoma leavgga vuolde, muhto Israela guovllus skiipastalli dámppa mearrabargi
  • Ovdal namuhuvvon olbmo mielde fárrejeaddji bearašlahttu.

Bargin eará riikkaide

Du vuoigatvuohta oažžut dikšuma ja geavahit dearvvašvuohtafuolahusa bálvalusaid barganriikkastat vuođđuduvvá barganriikkat láhkaásaheapmái. Čielggat ovddalgihtii, makkár dikšumii dus lea vuoigatvuohta ja gáibidago dikšuma oažžun ovdamearkka dihte priváhta dáhkádusa.

Go barggat eará go EU- dehe Eeg-riikkas dehe Šveiccas, du oadjudeapmái buohcama várás Suomas váikkuha dábálaččat olgoriikkain orodeapmi bistin. Áel mearrida oadjudeamistat buohcama várás ja addá mearrádusa Suoma sosiáladorvvu láhkaásaheami guoskadeamis.

  • Ilmmut Áel:ii skoviin Y 38 bargamis olgoriikkain ja fárremis olgoriikkaide, mii bistá badjel golbma mánu.
  • Jos leat oadjuduvvon buohcama várás Suomas olgoriikkain bargamat áigge, sáhtát geavahit Áel-goartta ja oaččut buohccedikšunbuhtadusaid.

Du vuoigatvuohta geavahit Suomas almmolaš dearvvašvuohtafuolahusa bálvalusaid vuođđuduvvá magistráhta dahkan registreremii ruovttugielddas. Ruovttugielddat seailu dábálaččat Suomas, jos orodat olgoriikkain vuollái jagi.

  • Jos dus ii leat Suomas ruovttugielda, oaččut almmolaš dearvvašvuohtafuolahusas dušše hohpolaš dikšuma. Mávssát ieš hohpolaš dikšuma goluid.
  • Jos dus lea Suomas ruovttugielda, sáhtát geavahit buot ruovttugielddat almmolaš dearvvašvuohtafuolahusa bálvalusaid.