Jos veajuiduhttindárbot lea šaddan johtalusvahágis dehe ámmátdávddas, veajuiduhttima ordnen ii gula Áel:ii, muhto dan ovddasvástádus lea dáhkádusfitnodagas. Šiehta iežat dáhkádusfitnodagain ovddalgihtii meannudeamis, jos du ulbmilin lea ohcalit olgoriikkaide veajuiduhttima oažžuma várás.

Veajuiduhttin olgoriikkain buohcanoadjolága vuođul

Sáhtát ohcalit geavahit veajuiduhttinbálvalusaid olgoriikkaide seamma eavttuiguin go Suomas. Gažaldat sáhttá dalle leat ovdamearkka dihte fysioterapiijas čuohpadusa maŋŋel.

  • Iešguhtege riika fállá veajuiduhttinbálvalusaid iežas láhkaásaheami ja dearvvašvuohtafuolahusa vuogádaga mielde.
  • Olgoriikkaide sáhttet fállojuvvot veajuiduhttimin bálvalusat, mat Suomas eai gula dearvvašvuohtafuolahusa bálvalanválljašupmái dehe man golut eai buhttejuvvo Suoma buohcanoadjolága vuođul. Fuomáš, ahte Áel ii dalle buhtte veajuiduhttimis ollašuvvan goluid.

Sáhtát oažžut Áel:s buohcanoadjolága vuođul buhtadusa maŋálgihtii nuppi EU- dehe Eeg-riikkas dehe Šveiccas ožžojuvvon veajuiduhttima goluide, jos leat ohcalan ovdamearkka dihte geavahit fysioterapiijabálvalusaid.

Gáibideaddji dálkkodanveajuiduhttin

Sáhtát ohcalit olgoriikkaide geavahit terapiija, mii ordnejuvvo gáibideaddji dálkkodanveajuiduhttimin, jos don leat ožžon Áel:a veajuiduhttinmearrádusa vuoigatvuođas oažžut veajuiduhttima olgoriikkain. Sáhtát ohcat mearrádusa maid maŋálgihtii. Veajuiduhttin sáhttá mieđihuvvot, jos Áel:a veajuiduhttinlága gáibádusat ollašuvvet.

  • It dárbbaš sierra ovdalobi veajuiduhttima várás, mii addojuvvo olgoriikkain. Váldde goitge vuhtii, ahte veajuiduhttingoluid buhtten gáibida, ahte veajuiduhttin gullá suopmelaš bálvalanválljašupmái ja lea Áel:a veajuiduhttinlága mielde.
  • Iežat hálu mielde sáhtát sihtat Áel:s ovddalgihtii dieđuid, livččiigo du plánen veajuiduhttin olgoriikkain Áel:a veajuiduhttinlága vuođul buhttenvuloš. Áel addá váidalangelbbolaš mearrádusa vuoigatvuođas veajuiduhttimii goitge easka veajuiduhttinohcamuša vuođul.