Suopmelaš dálkkasmearrádusat

Suomas dálkkasmearrádusat leat dábálaččat elektrovnnalaš hámis. Sáhtát oastit dutnje merron dálkasa vaikko man apteaikkas, go čájehat apteaikkas doaktára addin buohccerávvaga, Áel-goartta dehe identitehtaduođaštusa.


Dieđut du elektrovnnalaš dálkkasmearrádusastat furkejuvvojit čohkkejuvvon diehtofuorkái, Reseaptaguovddážii, mii lea Fuorká-bálvalusaid (Kanta-palvelut) oassi. Reseaptaguovddáš doallá sisttis buot elektrovnnalaš reseapttaid ja apteaikkaid doaimmahusmerkemiid. Reseaptaguovddáža dieđuid vuođul vaikko mii Suomas doaibmi apteaikkaid sáhttá doaimmahit dutnje merron dálkasa, go čájehat apteaikkas buohccerávvaga, Áel-goartta dehe identitehtaduođaštusa.

Reseaptta sajes oaččut doaktáris čálalaš buohccerávvaga, mas leat dieđut dálkasis ja attusváldinrávvagat. Jos elektrovnnalaš dálkkasmearrádus lea čállojuvvon namain ja riegádanáiggiin, oaččut dálkasa apteaikkas dušše buohccerávvagiin.

Sáhtát geahččat iežat reseaptadieđuid Iežasfuorká-bálvalusas (Omakanta). Bálvalussii registrerejuvvo fierbmebáŋkodovddaldagaiguin, elektrovnnalaš persovdnagoarttain dehe mobiilanannemiin. Bálvalusa atnu gáibida maid suopmelaš identitehtadovddaldaga.

Sáhtát ođasnuhttit elektrovnnalaš dálkkasmearrádusa Iežasfuorká-bálvalusas dehe iežat dearvvašvuohtafuolahusa dehe apteaikka bakte. Apteaikkat sáhttet bearrat bálkkašumi reseaptta ođasteamis.

Reseaptaguovddáža dieđut leat dearvvašvuohtafuolahusa ámmátolbmuid, apteaikkas farmasevttaid ja provisoraid sihke guoskevaš surggiid stuđeanttaid anus, geat dikšot buhcciid. Ovdamearkka dihte doavttir dehe farmasevta sáhttá dárkkistit Reseaptaguovddážis du olles dálkkasváldima. Dieđuid geahččamii galgá álohii sihtat du miehtama. Dálkasa mearran doaktáris ja buohccedikšus lea goitge álohii lohpi geahččat Reseaptaguovddážis dálkasiid, mat dutnje leat merrojuvvon.

Doavttir, bátnedoavttir dehe buohccedikšu sáhttá čállit dálkkasmearrádusa Suomas

Dálkkasmearrádusa sáhttá Suomas addit doavttir, bátnedoavttir ja buohccedikšu, geasa lea mieđihuvvon ráddjejuvvon dálkkasmearranvuoigatvuohta. Buohccedikšu sáhttá oažžut vuoigatvuođa mearrat dálkasiid muhtin dábálaš dávddaide dehe vuoigatvuođa joatkit doaktára mearran dálkkasváldima muhtin guhkesáigge buozalmasain, jos son lea čađahan gáibiduvvon lassioahpu ja Sosiála- ja dearvvašvuohtasuorggi lohpe- ja gozihanvirgelágádus (Valvira) lea mieđihan sutnje sierranastindovddaldaga.

Dálkkasmearrádus sáhttá Suomas čállojuvvot juogo dálkasa gávpenamain dehe dálkkasávdnasa váikkuheaddji ávdnasa namain.

Dálkkasmearrádus lea vuoimmis Suomas guokte jagi mearran- ja ođastanbeaivvi rájes. Guovddášnearvavuogádahkii váikkuheaddji (EGV-dálkasat) ja gárihuhtti dálkasiid dálkkasmearrádusat leat goitge vuoimmis dušše ovtta jagi.