Olgoriikalaš dálkkasmearrama geavaheapmi Suomas

Sáhtát oastit dálkasiid Suomas nuppi EU- dehe Eeg-riikkas dehe Šveiccas čállojuvvon dálkkasmearramiin, jos dálkasis lea vuovdinlohpi Suomas. Eará go EU- dehe Eeg-riikkas dehe Šveiccas čállojuvvon dálkkasmearramiin ii sáhte oastit dálkasiid Suomas.


Nuppi EU- dehe Eeg-riikkas dehe Šveiccas čállojuvvon dálkkasmearran galgá doaimmahuvvot Suomas, jos das leat čuovvovaš dieđut:

  • buohcci ovdanamma, goargu ja riegádanáigi
  • dálkkamearrama addinbeaivi
  • dálkkasmearrama addán dearvvašvuohtafuolahusa ámmátolbmo dieđut: goargu, ovdanamma, ámmátlaš dohkálašvuohta, njuolggooktavuohtadieđut (šleađgaboastačujuhus ja telefonnummár dehe fáksa, riikkaidgaskasaš guovlonummáriin), bargočujuhus (maiddái riika) ja vuolláičálus
  • dálkkasdieđut: dálkkas váikkuheaddji ávdnasa namain, dálkkashápmi, mearri, givrodat ja attusváldinrávvagat.

Gárrenávdnasiid luohkkái juhkkojuvvon dehe psykotrohpalaš (siiddut suomagillii) dálkasiid ii sáhte oastit nuppi EU- dehe Eeg-riikkas dehe Šveiccas čállojuvvon dálkkasmearramiin. Jos dárbbašat namuhuvvon dálkasiid orodettiinat Suomas, de don galggat sihtat reseaptta doaktáris, guhte doaibmá Suomas.

Jos áiggut háhkat dálkasa nuppi lahttoriikkas, de dálkkasmearran galgá leat čállojuvvon váikkuheaddji ávdnasa namain. Dálkkasmearrama sáhttá čállit gávpenamain, jos gažaldat lea biologalaš dálkasis dehe jos gávpenama geavaheapmái lea ákkastallojuvvon ágga. Gávpenama atnu galggá ákkastallojuvvot dálkkasmearramis.

EU-riikkain leat geavahusasteaset sierralágán dálkkasmearranskovit. Dálkkasmearramiid olgguldas hápmi ii leat dahkkon ovttalágánin. Muhtin riikkat leat váldán atnui sierra skovi dálkásiid várás, mat háhkkojuvvojit olgoriikkain, muhto eai visot. Nuppi EU-riikkas addojuvvon dálkkasmearran galgá doaimmahuvvot apteaikkas, jos das leat bajábealde namuhuvvon dieđut skovi olgguldas hámis fuolakeahttá.

Dálkkasmearrama eaktivuođa čielggadeapmi

Apteaika sáhttá biehttalit doaimmaheames nuppi EU- dehe Eeg-riikas dehe Šveiccas addojuvvon dálkkasmearrama, jos lea ágga eahpidit leago dálkkasmearran eakti. Dárbbu mielde apteaika sáhttá čielggadit Rájiid rasttildeaddji dearvvašvuohtafuolahusa kontáktačuoggá bakte dálkasa mearran olbmo vuoigatvuođa mearrat dálkasiid.

Eurohpa riikkain sierra dearvvašvuohtafuolahusa ámmátjoavkkuin leat iešguđetlágán vuoigatvuođat dálkasiid mearramis. Máŋggain riikkain ovdamearkka dihte buohccedikšut sáhttet mearrat muhtin dálkasiid. Dálkkasmearrádus galgá doaimmahuvvot Suomas, jos olbmos lea leamaš vuoigatvuohta mearrat dálkasa dan riikkas, gos dálkkasmearran lea addojuvvon.