Dálkkasdikšun Suomas

Dálkkasdikšun lea buohcci dikšuma ja dearvvašvuohtafuolahusa oassi. Suomas dálkasiid sáhttá mearrat doavttir ja dihto eavttuid mielde buohccedikšu, geasa Sosiála- ja dearvvašvuohtasuorggi lohpe- ja gozihanvirgedoaimmahat (Valvira) lea mieđihan ráddjejuvvon dálkkasmearranvuoigatvuođa.


Dearvvašvuohtafuolahusa ámmátolbmot oassálastet dálkkasdikšumii oahpuset ja vásáhusaset mielde. Juohke ámmátolbmos lea alddis ovddasvástádus iežas ollašuhttin dálkkasdikšumis.

  • Lágalažžan dahkkon dearvvašvuohtafuolahusa ámmátolbmot, ovdamearkka dihte buohccedikšut, ožžot oahpuset vuođul viiddes válmmasvuođaid ollašuhttit dálkkasdikšuma. Sis goitge gáibiduvvo maiddái sierra doaibmabáikeguovdasaš lohpi dalle, go gažaldat lea gáibideaddji dálkkasdikšumis, ovdamearkka dihte dálkasiin, mat addojuvvojit suona siskkáldasat, dehe varrasirdimis.
  • Namahussuddjejuvvon ámmátolbmot, ovdamearkka dihte lagasdikšut, sáhttet almmá sierra lobi haga juohkit ja addit dálkasiid buohccái, go lea gažaldat dálkasiin, mat addojuvvojit nu daddjojuvvon lunddolaš geainnu bakte, dego tableahtain sihke čalbme- ja bealljegoaikkanasain. Sii sáhttet oažžut doaibmabáikeguovdasaš lobi addit dálkasiid ovdamearkka dihte čuggestahkan.

Dearvvašvuohtafuolahusa bargoaddis lea ovddasvástádus das, ahte dan bargit oassálastet dálkkasdikšumii máhtuset mielde.

Dearvvašvuohtafuolahusa doaibmaovttadagas, ovdamearkka dihte dearvvašvuohtaguovddážis dehe buohcceviesu ossodagas, ferte leat dálkkasdikšunplána, masa dálkkasdikšun, mii ollašuhttojuvvo ovttadagas, galgá vuođđuduvvat. Plánas meroštallojuvvo, mot ovttadagas ollašuhttojuvvojit ja čuvvojuvvojit dálkkasdikšun sihke dálkkasdikšumii oassálastiid ovddasvástádusat.

Gielddat ja buohccedikšunbiirret háhket buohcceviesuin ja eará dikšunlágádusaid adnon dálkasiid daid doaimmaheddjiid gilvalahttimiin háhkanlága mielde.

Dálkkasdikšuma golut buohccái

Dálkasat, mat addojuvvojit buohcceviesus ja eará dikšunlágádusas, leat du dikšuma oassi ja dat gullet áššehasmáksui. Daid goluin ii berrojuvvo rehket sierra dalle, go orut Suomas dehe dus lea vuoigatvuohta oažžut dikšun EU-láhkaásaheami dehe riikkaidgaskasaš sosiáladorvosoahpamuša vuođul.

Jos šattat máksit ieš dikšuma duođalaš goluid, váldojuvvojit goluin vuhtii maid golut, mat šaddet dálkasiin. Dus leat alddát ovddasvástádus dikšuma duođalaš goluin ovdamearkka dihte dalle, jos ohcalat dikšumii Supmii.

Buohcci galgá ieš háhkat apteaikkas dálkasiid, mat adnojuvvojit rabasdikšumis. Áel buhtte dálkasiid, mat adnojuvvojit rabasdikšumis, goluid Suomas orruide ja buohcama várás oadjuduvvon olbmuide. Sáhtát oažžut Áel:s buhtadusa dálkkasgoluide maid, jos dus lea vuoigatvuohta dikšumii Suomas, mii vuođđuduvvá EU-láhkaásaheapmái dehe riikkaidgaskasaš soahpamuššii.

Fimea čuovvu dálkasiid dorvvolašvuođa ja árrováikkuhusaid

Suomas dálkasiid dorvvolašvuođa ja árrováikkuhusaid bearráigeahččá Dálkkassuorggi dorvvolašvuohta- ja ovddidanguovddáš Fimea, masa doaktárat ja apteaikkat ilmmuhit iežaset fuomášan árrováikkuhusain. Jos don leat ožžon dálkasis unohas oalgeváikkuhusaid, sáhtát maid dahkat ieš ilmmuhusa Fimeai.