Dálkasiid doalvun olgoriikkaide

Dábálaččat don sáhtát váldit mátkái mielde iežat dárbbašan reseapta- ja iešdikšundálkasiid. Čielggat riikiibuktima ráddjehusaid ovdal mátkki, daningo riikkaid gaskkas leat erohusat das, man olu ja maid dálkasiid riikii oažžu buktit. Gánnáhahtti lea čielggadit ovddalgihtii maiddái vejolaš čađamannanriikkaid njuolggadusaid ja ráddjehusaid.


Go mátkkoštat olgoriikkaide, váldde fárrui dálkkasmearrádusaid dehe daid kopiijaid. Jos du dálkkasmearrádusat leat elektrovnnalaš hámis, váldde mielde buohccerávvaga dehe čoahkkáigeassočáláhusa, man sáhtát čálihit ieš Iežasfuorká-bálvalusas (Omakanta). Dárbbu mielde oaččut dan maid apteaikkas dehe dearvvašvuohtafuolahusa doaibmaovttadagas.

Mátkkoštettiinat fievrrit dálkasiid originálabáhkas ja báhkke dálkasiid giehtamátkedávviriidda. Smiehta dárbbašatgo mielde diagnosadieđuid dehe kopiija dikšunmuitalusas eŋgelasgillii dehe čuozáhatriikka gillii jorgalussan.

Muhtin diliin sáhttá gáibiduvvot ovdamearkka dihte buktinlohpi dehe eiseválddi addin duođaštus. Dieđu dálkasiid buktima ráddjehusain oaččut čuozáhatriikka duolloeiseválddiin sihke EU-riikkaid kontáktačuoggáin.

Gárihuhtti ja guovddášnearvavuogádahkii váikkuheaddji dálkasiid doalvun olgoriikkaide

Mátkkoštettiinat Schengen-guovllus, dus galgá leat fárustat Schengen-duođaštus, jos fievrridat fárustat gárrenávnnasin klassifiserejuvvon dálkasa, eanas dálkasiid, mat váikkuhit guovddášnearvavuogádahkii (EGV-dálkasat) dehe psykotrohpalaš dálkasiid. Duođaštusain čujuhuvvo dálkasa dárbbašlašvuohta.

Schengen-guvlui gullet Suopma, Ruoŧŧa, Norga, Dánmárku, Islánda, Duiska, Belgia, Frankriika, Hollánda, Nuortariika, Luxemburg, Espánnja, Portugal, Itália, Greika, Estteeanan, Látvia, Lietuva, Polska, Čeahkka, Slovákia, Uŋgár, Slovenia, Malta ja Šveica.

Suomas Schengen-duođaštusa oažžu apteaikkas. Váldde mielde dálkkasbáhka, dálkasa dálkkasmearrádusa ja mátkkoštanáššegirjji (pássa dehe identifikašuvdnagoarta), go ozat duođaštusa.

Jos it leat sihkar dárbbašatgo Schengen-duođaštusa iežat dálkasa várás, sáhtát dárkkistit ášši apteaikkas dehe Dálkkassuorggi dorvvolašvuohta- ja ovddidanguovddážis (Fimea).