Boađe deaivvadit Rájiid rasttildeaddji dearvvašvuohtafuolahusa kontáktačuoggá Mátki 2018 -meassuide

Rájiid rasttildeaddji dearvvašvuohtafuolahusa kontáktačuoggá ja Áela áššedovdit leat deaivamis Mátki 2018 -meassuin 18.–21.1.2018 ossodagas 6p60. Meassoossodagasteamet Barcelona mosaihkkaduovdagis sáhttá oahpásnuvvat dikšunbáikkiválljema fierbmebálvalussii, Hoitopaikanvalinta.fi, jearrat riikkaidgaskasaš buohccedikšumis ja diŋgot eurohpalaš buohccedikšungoartta.

Dikšunbáiki.fi-fierbmebálvalusas oaččut dieđu dearvvašvuohtabálvalusaid geavaheamis Suomas ja olgoriikkain. Siiddut veahkehit gažaldagain, mat laktásit dearvvašvuohtafuolahussii riikkaidgaskasaš diliin, ovdamearkka dihte jos buohccát fáhkkestaga olgoriikkain dehe mátkkoštat buohccedikšuma várás nuppi riikii. Siidduin oaččut dieđu maid buohcci vuoigatvuođain, dikšungoluin ja daid buhttemis sihke dálkasiid oastimis olgoriikkain.

– Leat aiddo beaivádan badjel 50 riikka riikagovvádusaid, mat muitalit dearvvašvuohtafuolahusas. Eanangovvádusain lea olu mátkkošteaddjái ávkkálaš diehtu sierra riikkaid dearvvašvuohtaválvalusain. Daid sáhttá čálihit álkit mielde mátkái. Siiddut doibmet anolaččat maiddái mátketelefovnnas ja tableahtas, muitala kontáktačuoggá kommunikašuvdnaplánejeaddji Annamari Qvist. – Dikšunbáiki.fi-siidduid buot sisdoalut leat oažžunsajis suoma-, ruoŧa-, eŋgelas- ja davvisámegillii. Siidduin lea maid diehtu suopmelaš ja suomaruoŧŧelaš seavagillii.

Eurohpalaš buohccedikšungoarttain oaččut divššu, jos buohccát olgoriikkain

Eurohpalaš buohccedikšungoartta gánnáha váldit mátkái fárrui, daningo heahkka buohccán olgoriikkamátkkis sáhttá muđuid šaddat divrrasin. Goarttain oaččut dálkkasdieđalaččat vealtameahttun buohccedikšuma almmolaš dearvvašvuohtafuolahusas, go mátkkoštat EU- dehe Eeg-riikkain dehe Šveiccas. Goarttain beassá dikšui maid, jos guhkesáiggebuozalmas gáibida mátkkis fáhkka dikšuma dehe jos dárbbaša dikšuma áhpehisvuođa dehe riegádahttima geažil. Eurohpalaš buohccedikšungoarttain dikšuma oažžu seamma haddái go báikkálaš áššehasat ožžot.

Áel mieđiha eurohpalaš buohccedikšungoartta olbmuide, geaid buohccedikšungoluin Suomas lea ovddasvástádus. Mátkemeassuid áigge sáhtát diŋgot nuvttá goartta meassoossodagasteamet. Eurohpalaš buohccedikšungoartta sáhttá diŋgot maid fierpmis Áela fierbmesiidduin gaskabláđis áššiiddikšun (http://www.kela.fi/davvisamegiella) dehe nummáris 020 692 203 má/vu–be diibmu 8–17. Áela áššiiddikšunbálvalussii registrerejuvvo fierbmebáŋkodovddaldagaiguin dehe mobiilasihkkarastimiin.

Meassuin hommet ja guorahallamus oba meassuid áigge

Meassoossodagasteamet sáhtát oassálastit vuorbádeapmái nu ahte vástidat beaivvi gažaldahkii dehe juogát govat alddát birra ja meassolaggás Twitterii dehe Instagrámmii. Meassodovdamušaid sáhttá čuovvut somes dovddaldagain #Matka2018 ja #hoitopaikanvalinta.