Buohcanoadjobuhtadusat olgoriikkain addojuvvon bátnedikšumis: Eanemusat bánit dikšojuvvojit ain Estteeatnamis

EU-láhkaásaheapmi dahká vejolažžan suopmelaččaide ohcaleami bátnedikšumii nuppi EU- dehe Eeg-riikii dehe Šveicii. Dikšumii sáhttá ohcalit juogo Áel:a mieđihan ovdalobiin dehe iešoaivves. Jos divššut áššiidat bátnedoaktáris iešoaivves, nu sáhtát ohcat Áel:s buhtadusa seamma ákkaiguin go dikšumis, mii Suomas lea addojuvvon priváhta dearvvašvuohtafuolahusas.

Vaikko bátnedikšumis sáhttá nappo oažžut buohcanoadjobuhtadusaid measta oba Eurohpas, máŋggas suopmelaččain eai velge mátkkoš Estteeatnama guhkkelii bátnedoaktárii.

– Olgoriikkaide iešoaivves bátnedikšumii ohcalan Áel-buhtadusain lagabui 90 proseantta máksojuvvojedje jagi 2016 dikšumiin, mat ledje addojuvvon Estteeatnamis, muitala plánejeaddji Reetta Kyyrö Áel:a riikkaidgaskasaš áššiid máhttinguovddážis.

Diibmá Áel:s máksojuvvui buhtadus Estteeatnamis addojuvvon bátnedikšumis 7 342 háve, go ovddit jagi buhtadusat máksojuvvojedje 6 394 háve. Estteeatnama lassin suopmelaččat manne bátnedikšumis Espánnjas ja buhtadusat máksojuvvojedje ráhpadis 670 háve. Ruoŧas addojuvvon dikšumis Áel-buhtadusmearrádusaid mearri lei 33, Duiskkas 31, Uŋgaris 62 ja Polskkas 49.

Vai olgoriikkain addojuvvon bátnedikšumis máksojuvvojit buhtadusat, galgá addojuvvon dikšun gullat Suoma dearvvašvuohtafuolahusa bálvalanválljašupmái ja buohcanoadjolága mielde dat ferte leat buhttehahtti. Bálvalanválljašumiin dárkkuhuvvo Suomas almmolaš ruhtaváriiguin ruhtaduvvon dearvvašvuohtafuolahus ja buohccedikšun sihke priváhta deavvašvuohatbálvalusat, main oažžu buohcanoadjobuhtadusa.

– Áel ii buhtte kosmehtalaš doaibmabijuin šaddan goluid, ovdamearkka dihte bániid vilggodahttima. Protehtalaš dikšuma doaibmabijuid golut ja bátneteknihkkara barggus šaddan golut buhttejuvvojit duššefal soahteveteránaide ja bombanjáskiide. Njulgendikšun buhttejuvvo, go dat lea vealtameahttun, ovdamearkka dihte áššehasas lea mearkkašahtti gáibbiid iešaddiluvvon šaddan- dehe čálganárru, dadjá Reetta Kyyrö.

Sáhtát liktásit ohcalit atnit dearvvašvuohtabálvalusaid olgoriikkain. Sáhtát ohcalit geavahit sihke vuođđodearvvašvuohtafuolahusa ja spesiálabuohccedikšuma bálvalusaid ja oažžut dikšuma maid guhkesáigge buozalmassii. Don it dárbbaš ilmmuhit áššis ovddalgihtii Áel:ii dehe eará eiseválddiide. Áel buhtte nuppi EU- ja Eeg-riikkas ja Šveiccas addojuvvon dikšuma maŋálgihtii.